Shkup, 24 qershor, Zhurnal.mk – Në kuadër të shënimit të Ditës Ndërkombëtare të Administratës Publike, ministri i Administratës Publike, Goran Minçev, sot realizoi takim bilateral me ministren e Administratës Publike dhe Vetëqeverisjes Lokale të Republikës së Serbisë, Snezhana Paunoviq.
Në takim u konfirmua interesi i përbashkët për thellimin e mëtejshëm të bashkëpunimit institucional dhe shkëmbimin e përvojave në fusha me interes të ndërsjellë, veçanërisht në zhvillimin profesional të nëpunësve administrativë.
„Grupi i përbashkët i punës, i formuar për koordinimin dhe realizimin e aktiviteteve nga Memorandumi, po punon aktivisht dhe shënon përparim të rëndësishëm në disa fusha me interes të ndërsjellë. Rezultatet e arritura deri më tani paraqesin bazë të fortë për thellimin e mëtejshëm të bashkëpunimit“, theksoi ministri Minçev.
Vëmendje e veçantë iu kushtua përmirësimit të sistemit të trajnimeve dhe ndërtimit të një administrate profesionale, efikase dhe moderne. Në këtë drejtim u theksua rëndësia e përvojave dhe praktikave të mira të Akademisë Kombëtare për Administratë Publike të Republikës së Serbisë, e cila përfaqëson shembull të njohur në rajon për qasje sistematike ndaj zhvillimit të vazhdueshëm profesional të nëpunësve publikë.
Në fokusin e bisedimeve ishte edhe transformimi digjital i procesit të mësimit dhe trajnimit. U shqyrtua përparimi në shkëmbimin e përvojave lidhur me sistemet për menaxhimin e mësimit (LMS), zhvillimin e moduleve elektronike dhe futjen e zgjidhjeve moderne digjitale që do të sigurojnë më shumë qasje, efikasitet dhe cilësi të trajnimeve në sektorin publik.
Takimi edhe një herë konfirmoi përkushtimin e të dy ministrive për bashkëpunim praktik dhe frytdhënës, i cili përmes aktiviteteve konkrete kontribuon në forcimin e kapaciteteve institucionale dhe përmirësimin e cilësisë së shërbimeve publike në interes të qytetarëve të të dy vendeve.
