Shkup, 6 korrik, Zhurnal.mk – Leja e rinovuar për “Usje” do të jetë në përputhje me ligjin e ri për kontrollin e emetimeve industriale, tha sot ministri i Mjedisit dhe Planifikimit Hapësinor, Muhamed Hoxha.
Në pyetjen e gazetarëve se sipas cilit ligj do të jepet leja për Usjen, ministri u përgjigj:
“Leja e re për Usje do të jetë me parametra nga ligji i ri, i cili hyn në fuqi në shtator të vitit 2027. Premtoj se e gjithë procedura do të jetë transparente dhe publiku do të informohet vazhdimisht për të gjitha hapat gjatë procesit të rinovimit të lejes.”
Fabrika e çimentos, në fund të majit, kërkoi nga ministria kompetente rinovimin e lejes. Procesi po monitorohet nga aktivistët mjedisorë, të cilët kohët e fundit, përmes protestave, kanë paralajmëruar se po e ndjekin nga afër procedurën dhe akuzojnë se kompania kërkon të vazhdojë punën me vlerat e vjetra kufitare të ndotjes.
Të premten u mbajt një debat publik ku morën pjesë qytetarë, anëtarë të organizatave ekologjike dhe civile, përfaqësues të kompanisë dhe të institucioneve kompetente. Aty, nga Ambasada e Parë e Fëmijëve në botë “Megjashi” pyetën nëse mund të garantohet që fëmijët që jetojnë rreth çimentores “Usje” nuk ekspozohen ndaj ndotjes nga substanca toksike, ndërsa nga Ministria e Mjedisit u tha se do të përgjigjen me shkrim.
Nga nisma qytetare “Stop për USJE” thanë se as me lejen e re nuk do të ndryshojë asgjë, sepse lejohen vlera të larta. Ata theksojnë se askund nuk është shkruar qartë se leja do të jepet sipas ligjit të ri.
Përfaqësues të kompanisë, në debatin publik, prezantuan mënyrën e punës së tyre, duke pretenduar se respektojnë standardet evropiane dhe se janë të kontrolluar nga Ministria e Mjedisit.
