Shkup, 8 korrik Zhurnal.mk – Numri i të punësuarve në Maqedoninë e Veriut gjatë vitit 2025 ka arritur në 614.334 persona, ndërsa mbi gjysmën e tyre e përbëjnë burrat, tregojnë të dhënat e publikuara nga Enti Shtetëror i Statistikave.
Sipas statistikave, 330.240 të punësuar janë burra, ndërsa 284.094 janë gra. Krahasuar me një vit më parë, numri i përgjithshëm i të punësuarve ka shënuar një rënie të lehtë prej 0,1 për qind.
Rënia, sipas Entit, lidhet kryesisht me uljen e numrit të të punësuarve në sektorin e industrisë përpunuese, ku është regjistruar një tkurrje prej 5,2 për qind.
Në të njëjtën kohë, rritje e punësimit është evidentuar në sektorin e akomodimit dhe shërbimeve ushqimore me 5,5 për qind, si dhe në veprimtaritë administrative dhe mbështetëse, ku numri i të punësuarve është rritur për 3,3 për qind.
Sa i përket përfaqësimit gjinor, gratë dominojnë vetëm në disa sektorë, përfshirë veprimtaritë financiare dhe të sigurimit, veprimtaritë profesionale, shkencore dhe teknike, arsimin, shëndetësinë, si dhe artin, argëtimin dhe rekreacionin.
Dallimi më i madh në favor të grave është regjistruar në sektorin e shëndetësisë, ku janë të punësuara rreth 33 mijë gra, krahasuar me rreth 9 mijë burra.
