Shkup, 12 gusht, Zhurnal.mk – Analisti Xhenur Iseni, përmes një postimi në profilin e tij në Facebook, ka theksuar rëndësinë e figurës së Arbën Xhaferit në kuadër të 25-vjetorit të Marrëveshjes së Ohrit.
Iseni vlerëson se përvjetori i marrëveshjes historike nuk duhet të shënohet pa përmendur kontributin dhe rolin e ish-kryetarit të Partisë Demokratike Shqiptare, Arbën Xhaferi.
“Shënimi i 25-vjetorit të Marrëveshjes së Ohrit nuk duhet të kalojë pa u përmendur Arbën Xhaferi. Sepse pas çdo marrëveshjeje historike ka njerëz që e kuptojnë kohën para se koha t’i kuptojë ata”, ka shkruar Iseni.
Sipas tij, Xhaferi nuk ishte vetëm pjesëmarrës në një proces politik, por një nga figurat që e kishte kuptuar rëndësinë e ndërtimit të paqes mbi bazën e barazisë, dinjitetit dhe bashkëjetesës.
“Xhaferi nuk ishte thjesht pjesëmarrës në një proces politik. Ai ishte një nga mendjet që e kuptoi se paqja nuk ndërtohet mbi fitues e të humbur, por mbi barazi, dinjitet dhe bashkëjetesë”, thekson Iseni.
Ai shton se 25 vjet pas nënshkrimit të Marrëveshjes së Ohrit, mund të ketë diskutime të shumta për zbatimin dhe rëndësinë e saj, por, sipas tij, roli i Arbën Xhaferit në këtë histori nuk duhet të harrohet.
“Sot, 25 vjet më pas, shumë gjëra mund të diskutohen për Marrëveshjen e Ohrit. Por një gjë nuk mund të harrohet: emri i Arbën Xhaferit është pjesë e historisë së saj”, ka përfunduar Iseni.
