Dubai, 26 gusht, argument.mk/ – Irani dhe Omani kanë arritur një marrëveshje për ndarjen e ujërave dhe të ardhurave nga Ngushtica e Hormuzit, por Irani paralajmëron se ngushtica nuk do të rihapet nëse SHBA-ja nuk pranon kushtet e marrëveshjes, raportoi “Reuters”.
Zëdhënësi i Gardës Revolucionare të Iranit, Hossein Mohebbi tha se Irani dhe Omani kanë negociuar për rreth një muaj dhe kanë arritur një marrëveshje të pranueshme për të dyja palët.
Sipas tij, marrëveshja përcakton pjesën që i takon secilit vend në ujërat e ngushticës dhe në të ardhurat që krijohen prej saj.
Irani ka akuzuar SHBA-në se po përpiqet të pengojë negociatat me Omanin duke thënë se, nëse Uashingtoni ndalon pengesat dhe pranon marrëveshjen, Ngushtica e Hormuzit mund të rihapet. Në të kundërt, Irani nuk do ta hapë atë.
Ngushtica mbetet e rrezikshme për anijet
Para nisjes së luftës në shkurt, përmes Ngushticës së Hormuzit kalonte rreth një e pesta e transportit global të naftës dhe gazit natyror të lëngshëm.
Që prej fillimit të konfliktit, pjesa më e madhe e transportit detar është ndërprerë, duke rritur çmimet globale të energjisë.
Edhe pse përplasjet mes SHBA-së dhe Iranit janë zbutur në javët e fundit, bisedimet për një marrëveshje paqeje kanë ngecur dhe sulmet ndaj anijeve kanë vazhduar, duke e bërë kalimin përmes ngushticës të rrezikshëm.
Irani ka vendosur gjithashtu në listën e zezë 45 anije, në një përpjekje për të ndaluar transferimet e naftës nga një anije në tjetrën, të përdorura nga prodhuesit e energjisë në Gjirin Persik, për të shmangur bllokadën iraniane.
Ndërkohë, SHBA-ja ka kërcënuar se do të ndëshkojë vendet që vazhdojnë të bëjnë biznes me Iranin, në kuadër të presionit për të kufizuar ekonominë iraniane.
Çmimi i naftës ra për të tretën ditë radhazi, me më shumë se 2 dollarë për fuçi, duke arritur nivelin më të ulët të dy javëve, pas sinjaleve se po rifillojnë përpjekjet për ndërmjetësimin e një marrëveshjeje për t’i dhënë fund luftës.
