Shkup, 1 shtator, argument.mk/ – Kryeministri Hristijan Mickoski, gjatë vizitës së sotme në Komunën e Butelit, duke iu përgjigjur pyetjes gazetareske lidhur me gjendjen me tekstet shkollore në fillim të vitit të ri shkollor, theksoi se, ndonëse para tre vitesh kjo dukej e pamundur, sot në të gjitha shkollat në vend janë siguruar tekste shkollore falas për të gjithë nxënësit, përveç kësaj, po ndërtohen shkolla të reja dhe po rikonstruktohet një numër i madh shkollash, si dhe palestra sportive dhe pishina, me qëllim krijimin e kushteve sa më të mira për më të dashurit tanë.
“Po, mund të konfirmoj se në të gjitha shkollat në vend janë siguruar tekste shkollore falas, diçka që deri para tre vitesh dukej e pamundur. Nxënësve u diktohej mësimi deri në gjysmën e vitit shkollor, ndërsa disa prej tyre nuk kishin tekste shkollore gjatë gjithë vitit shkollor.
Tani këta nga llumi sikur i harruan ato kohë kur nuk kishim tekste shkollore dhe e shoh atë grupin e vogël nga llumi se si sot guxon të përmendë, të kritikojë dhe madje do të thosha, deri në një masë edhe të fyejë.
Por ne, si Qeveri, do të vazhdojmë të investojmë për më të dashurit tanë, e ata janë fëmijët. Investojmë në rikonstruksionin e shkollave – e shihni, së shpejti, pas disa javësh, edhe kjo shkollë do të zgjerohet.
Po ndërtohen pishina, po ndërtohen palestra sportive, po ndërtohen shkolla të reja, po zgjerohen shkollat dhe po rinovohen”, theksoi Mickoski dhe shtoi:
“Kështu që mund të them se, siç tha edhe kryetari i komunës, mbi 50 objekte, ndoshta edhe më shumë, në të gjithë vendin janë duke u rikonstruktuar.
A është kjo e mjaftueshme? Jo.
A duhet të bëjmë më shumë? Po, duhet. Por, më falni, besoni, për dy vjet ne nuk mund ta rregullojmë diçka që për 35 vjet është shkatërruar në mënyrë sistematike.”
