Shkup, 2 shtator, argument.mk/ – Në momentin kur temë e diskutimit janë mosmarrëveshjet e Bullgarisë dhe Maqedonisë së Veriut, duket se ish-kryeministri Lupço Gjorgjievski, në vend se të ndihmojë në zgjidhjen e këtij problemi madhor për shtetin, ai ka marrë një rrugë tjetër. Nëpër gjitha komentet e tij, ai siç duket ka filluar një fushatë për të shpallur bullgarët të pafajshëm dhe të gjithë të tjerët fajtor. Por pse kjo ndodh pikërisht tani dhe a ndikojnë këto deklarata që ndasitë të thellohen edhe më shumë, dhe zgjidhja të jetë më e largët, shkruan “argument.mk/”.
Georgievski pohon se komunistët maqedonas u shkëputën nga Jugosllavia për t’iu bashkuar Bullgarisë
Ish-kryeministri Ljubço Georgievski ka hapur një nga temat më të diskutueshme të historiografisë maqedonase. Sipas tij, në vitin 1941, gjatë pushtimit të territorit të Maqedonisë nga Bullgaria, komunistët maqedonas në mënyrë masive dhe pothuajse unanimisht vendosën të largoheshin nga Partia Komuniste Jugosllave dhe t’i bashkoheshin Partisë Komuniste Bullgare.
Georgievski thotë se ky nuk ishte vendim i vetëm një personi, por një vendim i marrë nga pothuajse të gjithë kuadrot maqedonase të Partisë Komuniste në atë kohë.
Sipas tij, Komiteti Krahinor i Partisë Komuniste në Maqedoni vendosi, me pothuajse vota unanime, që të shkëputej nga Partia Komuniste Jugosllave dhe të lidhej me Partinë Komuniste Bullgare.
Me këtë qëndrim, Gjeorgjievski kërkon që kjo periudhë e historisë së Maqedonisë gjatë Luftës së Dytë Botërore të rishikohet dhe të studiohet përsëri mbi bazën e dokumenteve dhe fakteve historike.
Kush është Gjeorgjievski dhe çfarë ka proklamuar deri më tani!
Lupço Gjeorgjievski është politikan i njohur nga Maqedonia e Veriut, i cili ka shërbyer si Kryeministër i vendit nga viti 1998 deri në vitin 2002. Ai njihet si themeluesi dhe lideri i parë i partisë konservatore VMRO-DPMNE (nga viti 1990 deri në vitin 2003), ndërsa më vonë u shkëput për të krijuar partinë VMRO-Partia Popullore.
Gjatë karrierës së tij të gjatë politike, ai nga një nacionalist i rreptë maqedonas në fillim të viteve 90-ta u bë një politikan me qasje pragmatike dhe deklarata shpesh kontroverse mbi historinë dhe gjeopolitikën e rajonit.
Në fillim të viteve 90-ta, ai ishte ndër zërat e parë dhe më të zëshëm që proklamoi ndarjen e Maqedonisë nga ish-Jugosllavia dhe krijimin e një shteti të pavarur.
Si kryeministër gjatë konfliktit të armatosur në vitin 2001, ai ishte një nga nënshkruesit kryesorë të Marrëveshjes së Ohrit. Vite më vonë, ai zbuloi se gjatë krizës kishte propozuar privatisht edhe plane alternative, si shkëmbimi i territoreve dhe shkëmbim i popullsisë për të ndarë përfundimisht shqiptarët dhe maqedonasit.
Gjeorgjievski pohon se historia zyrtare e Maqedonisë së Veriut është e falsifikuar
Lupço Gjeorgievski vazhdimisht ka proklamuar hapur se historia zyrtare e Maqedonisë së Veriut është falsifikuar gjatë epokës komuniste jugosllave për të fshehur rrënjët e përbashkëta kulturore dhe historike midis maqedonasve dhe bullgarëve. Në vitin 2006, ai mori shtetësinë bullgare, duke nxitur debate të mëdha në opinionin publik maqedonas dhe hapur flet në interes të bullgarëve, duke pohuar se dy popujt janë vëllezër.
Ai pohon vazhdimisht se Maqedonia e Veriut mbetet nën një ndikim të fortë dhe dominant serb në media, politikë dhe ekonomi, duke argumentuar se elita maqedonase krijon “frikë artificiale” ndaj bullgarëve, shqiptarëve dhe Bashkimit Evropian, ndërsa nuk tregon asnjë rezistencë ndaj ndikimit të Beogradit.
Duke dashur të zhbllokojë integrimin, Gjeorgjievski po i bën shërbim Bullgarisë!
Ish kryeministri Lupço Gjeorgjievski vazhdimisht bën thirrje për tejkalimin e kontesteve historike mes Maqedonisë së Veriut dhe Bullgarisë me qëllim që vendi të zhbllokojë rrugën e integrimit në Bashkimin Evropian.
Por, edhe pse qasja e tij pragmatike dhe shpesh kontroverse e Gjeorgjievskit teorikisht synon të zhbllokojë integrimin evropian, në praktikë ajo ka një efekt të dyanshëm dhe tejet polarizues në Maqedoninë e Veriut.
Nga njëra anë, ai kërkon plotësimin e kushteve të vendosura nga Bashkimi Evropian, por nga ana tjetër, qëndrimet e tij shpesh irritojnë opinionin publik vendas.
Gjeorgjievski ka qenë ndër politikanët e paktë maqedonas të krahut të djathtë që e ka quajtur propozimin francez një fitore dhe jo një humbje. Ky propozim kërkon përfshirjen e pakicës bullgare në Kushtetutën e Maqedonisë së Veriut si kusht për hapjen e kapitujve. Sipas tij, bllokimi i këtij procesi vetëm sa e mban vendin larg BE-së pa asnjë përfitim.
Me deklarata e tij duke bërë thirrje për një rishikim të hapur dhe akademik të historisë, ai synon të eliminojë “arsyetimet” e Sofjes për të vënë veto, por nga ana tjetër shkakton shumë pakënaqësi.
Për shkak të deklaratave tejet pro-bullgare, qasja e tij shihet me mosbesim dhe tradhti nga një pjesë e madhe e popullsisë etnike maqedonase. Prandaj kjo e bën idenë e kompromisit me BE-në edhe më të vështirë.
Për shkak të stilit të tij radikal të dorëzimit përpara kërkesave historike të fqinjëve, ajo shpesh përdoret nga kundërshtarët për të justifikuar bllokimin e mëtejshëm të reformave të kërkuara nga BE.
Andaj, ndonjëherë heshtja është më e mirë se të flasësh, dhe në këtë rast Gjeorgjievski më shumë do t’i bënte nder vendit nëse heshte, se sa të nxiste debate të panevojshme që vetëm se irritojnë më shumë popullatën dhe nuk ndikojnë drejt afrimit të vendeve dhe gjetjes së zgjidhjes, por ndikojnë drejt thellimit të ndarjes dhe bllokimit të procesit, shkruan “argument.mk/”.
