Shkup, 27 shtator argument.mk/ – Kryeministri Hristijan Mickoski, në një intervistë për RTVM gjatë vizitës së tij në Nju Jork, tha se nga Bashkimi Evropian pret rezultate konkrete dhe të shpejta për qytetarët e Ballkanit Perëndimor, duke vlerësuar se përmes masave që qytetarët do t’i ndiejnë menjëherë mund të ulet frustrimi në rajon. Duke folur për takimin me përfaqësuesen e lartë të BE-së për Politikë të Jashtme dhe Siguri, Kaja Kallas, ku morën pjesë përfaqësues të vendeve të Ballkanit Perëndimor, Mickoski tha se gjatë diskutimeve ka krijuar përshtypjen se po rikthehen temat e viteve të para të viteve ’90.
“Kam ndjenjën se gradualisht në Ballkan po rikthehen temat e viteve të para të viteve ’90. Kisha ndjenjën se po krijohet një tension që për mua, në këtë moment, në shekullin XXI, ishte vërtet një surprizë e madhe”, tha Mickoski.
Në takim, nga vendet e Ballkanit Perëndimor në nivel kryeministrash ishin të pranishëm Mickoski dhe kryeministri i Kosovës, Albin Kurti. Mali i Zi u përfaqësua nga presidenti Jakov Millatoviq, ndërsa Serbia, Bosnja dhe Hercegovina dhe Shqipëria nga ministrat e Jashtëm.
Mickoski tha se ishte veçanërisht i shqetësuar nga tensionet që dëgjoi gjatë diskutimeve. Si një nga arsyet për mosmarrëveshjet mes Bosnjës dhe Hercegovinës dhe Serbisë ai përmendi varrimin e Ratko Mlladiqit, ndërsa si çështje tjetër përmendi mosmarrëveshjet e vazhdueshme mes Kosovës dhe Serbisë dhe çështjen e personave që njëra palë i konsideron organizatorë të sulmit në Banjskë.
“E gjithë kjo nuk më befason, por më befason fakti se si një çështje mund ta ndezë të gjithë rajonin. Ndoshta në dukje nuk është aq e madhe dhe nuk duket e tillë nga këndvështrimi ynë si Maqedoni, por qartësisht një çështje në dukje e thjeshtë mund të shkaktojë tensione serioze në shoqëri. Këto tensione mund të shndërrohen në konflikt. Nuk e pres këtë, por kjo ishte ndjenja ime dhe isha i shqetësuar”, tha kryeministri.
Pikërisht për këtë arsye, siç shpjegoi, gjatë diskutimit iu drejtua përfaqësueses së lartë të BE-së, Kaja Kallas, duke theksuar se rajonit i nevojiten “rezultate të shpejta” nga Bashkimi Evropian.
“Unë personalisht jam i shqetësuar për atë që dëgjoj sot në tryezë dhe na duhen rezultate të shpejta nga Bashkimi Evropian. Diçka që mund të realizohet shpejt, në mënyrë që frustrimi që ndjejnë qytetarët në rajon të fillojë gradualisht të ulet”, tha Mickoski.
Si shembuj të masave konkrete që mund të realizohen shpejt, ai përmendi çështjet që lidhen me transportuesit dhe regjimin “Roam at Home”, përkatësisht heqjen e paralajmëruar të tarifave të roamingut për qytetarët e gjashtë vendeve të Ballkanit Perëndimor në Bashkimin Evropian.
“Diçka që Bashkimi Evropian mund ta realizojë shpejt, në mënyrë që të mund të themi se nuk kemi vetëm retorikë, por kemi edhe diçka që qytetarët mund ta ndiejnë”, tha ai.
Mickoski tha se mesazhi i tij i dytë në takim ishte se gabimet e së kaluarës duhet të shërbejnë si mësim për të mos u përsëritur, në vend që rajoni të rikthehet te temat dhe retorika e së kaluarës.
“Gabimet e së kaluarës na mësojnë të mos i përsërisim, ndërsa duket se te disa vende të Ballkanit Perëndimor ka filluar të mbizotërojë një frymë e tillë. Ne duhet të synojmë ndërtimin e së ardhmes. Me një retorikë të tillë nxitëse nuk mund ta ndërtojmë të ardhmen ashtu siç dëshirojmë”, theksoi kryeministri.
Mickoski tha se Maqedonia e Veriut ka komunikim të mirë me vendet e rajonit dhe se gjatë qëndrimit në Nju Jork është takuar me disa liderë rajonalë.
“Ky ishte një nga qëllimet e qëndrimit tim këtu, të takohem me disa prej liderëve të rajonit. U takova me kryeministrin e Sllovenisë, zotin Janša, të Kroacisë, zotin Plenković, presidentin e Serbisë, Vuçiq, kryeministrin e Kosovës, Albin Kurti, etj.”, tha Mickoski.
Ai përsëriti se nga takimi me përfaqësuesit e vendeve të Ballkanit Perëndimor u largua me një ndjenjë shqetësimi, pasi një pjesë e asaj që dëgjoi, siç tha, e rikujtoi me fillimin e viteve ’90.
Sa i përket dokumentit që presidentja e Komisionit Evropian, Ursula von der Leyen, pritet ta prezantojë në Bruksel për zhbllokimin dhe riorganizimin e proceseve të caktuara në Union, Mickoski tha se nëse BE-ja dëshiron të bëjë një hap përpara, paralajmërimet duhet të shndërrohen në masa konkrete.
“Nëse vërtet Bashkimi Evropian dhe ky plan që duhet të prezantohet së shpejti do të kalojnë nga fjalët në vepra, atëherë diçka duhet të bëhet shpejt. Pra, të kemi atë që e quajnë ‘low-hanging fruit’, diçka që mund ta realizojmë menjëherë, një ‘quick win’, si një fitore të shpejtë që mund ta dorëzojmë”, tha Mickoski.
