Shkup, 29 shtator, argument.mk/ – Kryeministri i RMV-së, Hristijan Mickoski beson se largimi nga salla e Kombeve të Bashkuara para fjalimit të kryeministrit izraelit Benjamin Netanyahu, siç bënë dhjetëra delegacione të tjera në shenjë proteste kundër vrasjeve të civilëve në Palestinë, nuk është një mënyrë për të shprehur protestë, por një ikje nga realiteti.
Ai për “Lokalno” tha se ka mënyra shumë më krijuese për të shprehur protestë sesa largimi nga salla e OKB-së.
“Unë nuk jam në parim një person që nuk dëshiron të përballet me realitetin. Për mua, largimi dhe ikja nga përballja me realitetin është braktisje. Nuk mendoj se kështu manifestohet protesta, por përkundrazi është një mënyrë braktisjeje nga realiteti dhe nga thelbi. Ka mënyra shumë më substanciale dhe krijuese për të manifestuar protestën. Unë jam një person që në parim dëshiron të luftojë dhe të fitojë”, tha Mickoski.
Dhjetëra përfaqësues nga e gjithë bota dolën nga fjalimi i Netanyahut në OKB të enjten, më 24 shtator, në shenjë proteste kundër udhëheqësit izraelit dhe politikave e veprimeve të vendit të tij. Delegacione nga Turqia, Tunizia, Arabia Saudite, Katari, Senegali, Pakistani, Sudani, Irani dhe Indonezia ishin midis atyre që dolën kur Netanyahu filloi të fliste. Vende të tjera, përfshirë Spanjën, Afrikën e Jugut, Kuvajtin, Marokun, Nigerinë dhe Brazilin, nuk morën pjesë në seancë, sipas raportimeve. Maqedonia ishte midis vendeve që qëndruan për të dëgjuar kryeministrin izraelit.
