Paris, 5 nëntor, argument.mk/ – Sindikatat franceze kanë thirrur protesta të reja për ditën e sotme, me qëllim kërkimin e rritjes së pagave dhe kundërshtimin e shkurtimeve të shpenzimeve sociale. Ato po mobilizohen gjithashtu për një grevë të përgjithshme, ndërsa autoritetet presin që në protesta të marrin pjesë disa qindra mijëra persona.
Një numër i madh forcash policore pritet të angazhohet për të parandaluar përsëritjen e akteve të dhunës, të cilat u shënuan gjatë protestave të mëparshme në mesin e tetorit.
Punonjësit e sektorit publik pritet t’i bashkohen thirrjes për grevë, por ende nuk është e qartë se sa do të ndikohen udhëtimet dhe lëvizja e personave që shkojnë në Francë.
Kompania shtetërore e hekurudhave SNCF parashikon vetëm ndërprerje të vogla në shërbimet e trenave në distanca të gjata, sipas raportimeve të medieve.
Ndërkohë, fillimisht nuk ishte e qartë nëse greva e shpallur nga kontrollorët e trafikut ajror do të shkaktonte ndërprerje të konsiderueshme të fluturimeve. Metroja e Parisit pritet të funksionojë normalisht.
Lëvizja e Jelekë Verdhëve, si dhe organizatat e nxënësve dhe studentëve, kanë mbështetur thirrjen për protesta. Gjatë tri të shtunave të fundit, ato organizuan demonstrata kundër rritjes së kostos së jetesës dhe në mbështetje të përmirësimit të arsimit.
Ndërkohë, qeveria po përpiqet të arrijë një kompromis me protestuesit. Ministri i Ekonomisë, Roland Lescure, tha për televizionin BFMTV se qeveria po shqyrton mundësinë e një rritjeje të mëtejshme të pagës minimale, përtej rritjes që është parashikuar tashmë për janarin e vitit 2027.
“Paga minimale lidhet me dy çështje, nivelin e saj dhe kohën kur do të rritet. Në ditët në vijim do të jemi në gjendje të njoftojmë diçka”, deklaroi ministri.
