Ish-kryeministri Sali Berisha ka deklaruar se eksperti që denoncoi vjedhjen e të dhënave të sistemit TIMS, po përndiqet nga SPAK.
Duke folur nga dritarja e shtëpisë së tij poshtë së cilës mblidhen protestuesit demokratë, Berisha ka theksuar se 2 muaj më parë një ekspert denoncoi ministrin e Brendshëm Taulant Balla për vjedhjen e sistemit TIMS.
“Dy muaj më parë, një ekspert guximtar, denoncoi Taulant Ballën se vodhi të dhënat e Timsit, dhe Edi Ramën. Sepse pas Taulant Ballës, emëroi drejtor të IT, një njeri delinkuent, të inkriminuar me misionin e vjedhjes dhe eksportimit të të dhënave të krimit.
A e dini ju se ky njeri, ky burrë guximtar, patriot, ndiqet nga Skapi se u çori maskën Edi Ramës, Taulant Ballës dhe Skapistëve të tij.
Kush mund të flasë tjetër atëherë, përveç qytetarëve, të cilët duhet të marrin në dorë fatin e tyre”, u shpreh Berisha.
Sipas Berishës, SPAK po mbron krimet e Edi Ramës, Erion Veliajt dhe përfaqësuesve të tjerë të mazhorancës.
“…çdo mbrojtje që dumanistët i bëjnë Altin Dumanit dhe eksponentëve të tjerë të krimit në Skap, është mbrojtje për Edi Ramën, është mbrojtje për Erion Veliajn, është mbrojtje për Belinda Ballukun, Elisa Spiropalin, Damian Gjiknurin
Është mbrojtje për ministrin kriminel në detyrë, Taulant Ballën, ministrin trafikant”, tha Berisha.
Ndërkaq, Berisha u bëri thirrje demokratëve që të bashkohen në protestën e 20 shkurtit.
“20 shkurti është dita e madhe. Është dita e kushtrimit kombëtar, e protestës kombëtare. E revoltës kombëtare.
Ngrihuni të lebitisim tiraninë e krimit, tiraninë e vjedhjes, tiraninë e mjerimit.
Këta qeveritarë të lidhur kokë e këmbë me krimin, këta qeveritarë që vjedhin qindra milionë dhe miliarda, kanë krijuar parzmoren e tyre, parzmoren e vjedhjes së tyre, kanë krijuar Skapin”, nënvizoi Berisha.
