Shkup, 21 nëntor – Zëdhënësja e Qeverisë, Venera Azizi njoftoi se qeveria në mbledhjen e sotme të jashtë zakonshme ka vendosur që t’i japë Qytetit të Shkupit naftë nga rezervat shtetërore, me qëllim rikthimin e autobusëve në qarkullim dhe normalizimin e transportit publik në kryeqytete, përcjell TV21. Për të shfrytëzuar rezervat, qeveria u desh që të shpall gjendje krize.
“U konstatua gjendja e rëndë dhe mungesa e karburantit për nevojat e Ndërmarrjes së Qarkullimit Publik, me çka qeveria u kyç për zgjidhjen e këtij problemi. U miratua vendimi me të cilin përcaktohet ekzistenca e gjendjes së krizës në furnizimin me energji për ngrohje në rajonin e Shkupit. Për shkak të mungesës së energjisë termike, mundësisë për përdorimin e karburanteve alternative, dhe situatës në tregun e energjisë termike. Në bazë të këtij vendimi, u mundësua huazimi i një pjese të rezervave shtetërore të naftës për Qytetin e Shkupit”, tha mes tjerash Azizi.
