Shkup, 7 maj – Zëvendës kryeministri i parë Izet Mexhiti me zëvendësministren e Transportit dhe Lidhjeve, Kaltrina Zekolli dhe deputetin e zonës Adnan Azizi, kanë zhvilluar një vizitë pune në fshatin Pallçisht.
Në fokus të vizitës ishte shqyrtimi nga afër i problemit shumëvjeçar me rrjetin e ujësjellësit – një çështje që, sipas Azizit, përbën shqetësimin kryesor të banorëve të këtij fshati të Komunës së Bogovinës.
“U garantuam se pas finalizimit të projektit, do të ndahen fonde nga qeveria dhe me ka krejt do të angazhohemi për ta çuar deri në fund realizimin e projektit”, shkroi Azizi në një postim në rrjetet sociale.
Ai shtoi se VLEN mbetet e përkushtuar për të qenë afër qytetarëve dhe për të adresuar nevojat reale të tyre, duke theksuar se zgjidhja e problemit të ujësjellësit në Pallçisht është tashmë një përparësi në agjendën qeveritare.
Bashkëbisedim me banorët e Pallçishtes për problemin e ujit të pijshëm. Së bashku me Zëvendëskryeministrin e Parë, z. Izet Mexhiti dhe deputetin e zonës z.Adnan Azizi, zhvilluam një bashkëbisedim me banorët e fshatit Pallçishte në Komunën e Bogovinës, ku ndër çështjet kryesore u theksua problemi i kahershëm i furnizimit me ujë të pijshëm. Duke e konsideruar këtë çështje me prioritet, është caktuar një takim me përfaqësuesit e bashkësisë lokale në fund të kësaj jave, me qëllim që të shqyrtojmë mundësitë për një zgjidhje të qëndrueshme. Qeveria fuqizon komunat përmes dy thirrjeve të dedikuara deri tani për projekte, duke u krijuar atyre mundësi konkrete për të adresuar nevojat e banorëve në terren. Mbështetja për nevojat bazë të qytetarëve mbetet në qendër të angazhimit tonë institucional, ka shkruar Zekolli Shaqiri.
Kjo vizitë vjen në një moment kur qeveria e re ka shpallur si prioritet ndërhyrjet infrastrukturore në zonat rurale, ku për shumë kohë është ndier mungesa e investimeve të qëndrueshme.
