Strugë, 21 maj – Pavarësisht reshjeve të shiut, maturantët e gjimnazit “Ibrahim Temo” në Strugë nuk hoqën dorë nga parada e tyre tradicionale. Një aktivitet që nuk simbolizon vetëm mbylljen e një etape të rëndësishme, por edhe përfshirjen në një proces rajonal më të gjerë.
“Parada është një cikël që zhvillohet në Evropën Juglindore, me fillesë në Slloveni. Ne i jemi bashkuar këtij procesi prej disa vitesh. Pavarësisht kushteve të këqija atmosferike, vendosëm ta realizojmë. Kisha dëshirë që ta finalizonim në një ditë si kjo, duke i uruar maturantëve sukses dhe plot dashuri.”, – theksoi profesori, Blerton Raveni.
Ky aktivitet u realizua me përkushtim nga të gjithë dhe pa asnjë pengesë, as nga shiu i ditës.
“Sot është një ditë me shi, por gjimnazistët e “Ibrahim Temos” nuk e ndalën aktivitetin e tyre të përvitshëm për paradën. Kështu që, kur dëshirojnë të bëjnë diçka, nuk besoj se ka gjë që mund t’i ndalë. Ju uroj maturantëve suksese.”, – u shpreh drejtoresha, Besime Jonuzi.
Me entuziazëm dhe emocione të përziera, vetë maturantët rrëfyen përjetimet e tyre në këtë ditë të veçantë.
“Sot shënojmë një ditë shumë të lumtur për ne maturantët. Edhe pse është fundi, ne e përfunduam në mënyrën më të bukur. E kryem paradën edhe pse me shi dhe doli me sukses. Nesër na pret matura, e më pas shpresojmë për një të ardhme më të ndritur.”, – tha një maturant.
“Sot për ne është një ditë shumë e bukur, gëzojmë titullin “Maturant”. Mendoj të studioj në Shkup.”, – u shpreh një maturant tjetër.
Ky aktivitet i veçantë, edhe këtë vit, dëshmoi se motivimi dhe përkushtimi i të rinjve janë më të mëdha se çdo pengesë moti.
