Shkup, 26 maj – Këshilli Gjyqësor sot zgjodhi gjyqtarin suprem Afrim Fidani për kryetar të Gjykatës Supreme të Republikës së Maqedonisë së Veriut.
Fidani u zgjodh kryetar me 8 vota pro dhe 5 kundër. Kandidat ishte edhe kryetarja e mëparshme e Gjykatës Supreme, Besa Ademi, e cila mori vetëm dy vota.
Diskutimi midis anëtarëve të Këshillit Gjyqësor gjatë zgjedhjeve ishte në drejtim të asaj se ish kryetarja Besa Ademi ka dështuar në punën e saj, ndërsa për gjyqtarin Afrim Fidani theksuan se nuk e konsideronin atë si një gjyqtar të shquar, por se ai kishte një plan veprimi specifik me afate kohore të përcaktuara saktësisht që synonin përmirësimin e situatës.
Fidani është gjyqtar i Gjykatës Supreme që nga viti 2017.
Sipas një biografie të shkurtër të publikuar në ueb-faqen e gjykatës, pasi përfundoi shkollën e mesme dhe kreu shërbimin ushtarak, në vitin 1985 Fidani u regjistrua në Fakultetin Juridik në Universitetin e Prishtinës.
Në vitin 1989 u diplomua në Fakultetin e Drejtësisë. Përvoja e punës: Nga viti 1990 deri në vitin 1996, ai punoi në arsim në detyra juridike dhe administrative. Nga viti 1996 deri në vitin 2005, ai punoi në Inspektoratin Shtetëror të Punës të Republikës së Maqedonisë, si inspektor republikan i punës në fushën e marrëdhënieve të punës. Nga viti 2005 deri në vitin 2007 ishte sekretar i Komunës së Vrapçishtës – Vrapçisht. Nga viti 2007 deri në vitin 2011 ai ishte avokat me seli në Gostivar. Që nga 18 korriku i vitit 2011, ai është zgjedhur gjyqtar në Gjykatën e Apelit të Shkupit – Departamenti Penal.
