Deputetja e LDK-së, Hykmete Bajrami ka thënë se në Kosovë skandali më i madh i korrupsionit është ajo që po ndodh me energjinë.
Bajrami ka ftuar Prokurorinë që të hetohet çdo gjë, përfshirë edhe KEK-un, ZRRE dhe KOSTT.
Nga hetimet deputetja ka thënë se nuk bënë të përjashtohen as qeveria e as Ministria e Ekonomisë.
“Prokuroria e Kosovës duhet ta dijë se s’ka korrupsion më të madh sesa korrupsioni që po ndodhë me energji Duhet të hetohet çdo gjë. Duhet të hetohet KEK-u: Pse remontet bëhen dimrit? A është gjeneruar energji më shumë verës e natën kur nuk kemi konsum edhe aq, më pak ditën duke ndikuar në rritjen e importit? Të hetohen tenderët dhe ndikimi i realizimit të tyre në kapacitetet gjeneruese dhe rritjen e importit? Duhet të hetohet Qeveria/Ministria e Ekonomisë dhe ndërhyrjet politike në KEK, ZRrE dhe KOSTT”, ka shkruar Bajrami.
Bajrami tutje ka thënë se KOSTT-i duhet të hetohet sepse “si është e mundur që çmimet në ALPEX janë më të shtrenjta sesa në HUPX gjatë tërë vitit 2024 dhe gjatë viti 2025? Si është lejuar të kalojë importi i energjisë me çmim transporti deri në 800 euro për MWh?”
“Duhet të hetohet ZRrE-ja, sepse kjo licencon KEK-un, KOSTT-in dhe të gjithë operatorët privatë. Duhet të hetohet NOA si tregtari më i madh i energjisë dhe lidhjet e kësaj kompanie me Serbi e me këdo në Kosovë si dhe kompanitë dhe palët e tjera përftuese në krejt këtë situatë”, ka shkruar Bajrami në një postim në Facebook.
Ish-ministrja tutje ka theksuar se kushdo që e zbardh këtë skemë do të hyjë në historinë e këtij shteti si patrioti më i madh i pasluftës.
“Përndryshe, nëse ky skandal i përmasave të Watergate heshtet dijeni të gjithë se do të shkatërrojë ekonominë e këtij vendi dhe do ta varfërojë çdo familje në Kosovë. Mos harroni, në Kosovë janë mbi 700 mijë njehsorë/matës të energjisë – një euro më shumë në muaj për secilin, llogaritni sa kushton, por rritja prej 128% sa mendoni se është? E rritja deri në 260% për 1300 biznese – sa? Krejt këto kanë çmimin e të ardhmes së këtij vendi – nuk guxojmë me u bë peng i këtyre përfituesve, andaj na duhet reagim”, u shpreh Bajrami.
Ajo shtoi se një shtet dhe një shoqëri nuk mund të dorëzohen para veprës më të madhe korruptive që po ndodh në historinë e vendit tonë.
“Falënderoj gazetarët që kanë shpërfaqë fakte shokuese dhe na i kanë hapë sytë me gisht siç thotë populli, për me pa se çka po ndodhë në sektor”, tha Bajrami.
