Shkup, 15 shkurt – Klinika Universitare për Hematologji sot do të mbajë akademi solemne me rastin e hapjes së Qendrës për Transplant të Qelizave Staminale Hematopoetike, e cila u lëshua në përdorim para dy javësh, njoftoi Ministria e Shëndetësisë.
Në akademinë në amfiteatrin e Dekanatit të Fakultetit të Mjekësisë do të mbajnë fjalim ministri i Shëndetësisë në Qeverinë teknike Ilir Demiri, drejtorët e Klinikës për Hematologji dr. Irina Panovska-Stavridis dhe Flutim Kadriu, kryetarja e Odës së Mjekëve dhe drejtoreshë e Klinikës për Gastroenterohepatologji, dr. Kalina Stardelova-Grivçeva, si dhe udhëheqësja e Klinikës për Anestezi, Reanimacion dhe Mjekim Intensiv (KARIL) dhe koordinatorja kombëtare e transplantit, dr. Maja Mojsova Mijovska.
Qendra për transplantimin e qelizave staminale hematopoetike ndodhet në një kat tërësisht të ri me sipërfaqe prej 800 m2, donacion nga Ambasada e Shteteve të Bashkuara të Amerikës, e cila e ka mbështetur financiarisht ndërtimin me një milion euro. Mjetet e mbetura janë siguruar nga Fondi për Sigurim Shëndetësor me mbështetjen e Ministrisë së Shëndetësisë dhe Qeverisë së Republikës së Maqedonisë së Veriut.
