Banka Botërore njoftoi se bordi i i drejtorëve ekzekutivë ka miratuar ndihmën financiare për dy projekte të reja në Kosovë në vlerë totale prej 89.7 milionë dollarë (87.2 milionë euro) që synojnë forcimin e konkurrencës së sektorit privat.
Banka Botërore do të mbështesë Projektin e Zhvillimit të Sektorit Financiar, me vlerë 52 milionë dollarë, dhe Projektin e Lehtësimit të Tregtisë dhe Transportit (TTFP) 2.0, me vlerë 37.7 milionë dollarë përmes kredisë koncesionare nga Shoqata Ndërkombëtare e Zhvillimit (IDA), tha huadhënësi global në një deklaratë për shtyp të enjten.
Projekti për Zhvillimin e Sektorit Financiar synon të rrisë stabilitetin financiar dhe përfshirjen në Kosovë përmes forcimit të kapaciteteve të fondit të sigurimit të depozitave, financimit të firmave të pashërbyera dhe katalizimit të pagesave më të shpejta. Projekti do të forcojë mjedisin financiar për ndërmarrjet mikro, të vogla dhe të mesme (NMVM) duke ndarë kapital për garanci kredie përmes Fondit Kosovar për Garanci të Kredive, duke tërhequr potencialisht afro 200 milionë dollarë në investime të sektorit privat, thuhet në njoftim.
Projekti do të ndihmojë gjithashtu ministrinë e financave, punës dhe transfereve të Kosovës në krijimin e një Banke Kombëtare për Zhvillim, e cila do të financojë projekte zhvillimore që përputhen me prioritetet e qeverisë.
Projekti i dytë, TTFP 2.0, do të financojë infrastrukturën dhe sistemet e TI-së për të ulur kostot tregtare dhe për të rritur efikasitetin e transportit, duke rritur tregtinë ndërmjet Kosovës dhe vendeve fqinje. Projekti do të implementojë sisteme të tarifave elektronike në rrugët kyçe dhe do të rrisë sigurinë në 21 vendkalime hekurudhore dhe një pjesë rrugore me rrezik të lartë në Kosovë, transmeton Express.
“Përqendrimi në përmirësimin e qasjes në financa për firmat dhe lehtësimi i lidhjes është një faktor kyç për rritjen dhe krijimin e vendeve të punës, dhe do të sjellë përfitime të qarta për Kosovën dhe qytetarët e saj”, tha Massimiliano Paolucci, menaxher i Bankës Botërore për Kosovën dhe Maqedoninë e Veriut në një deklaratë.
