Tiranë, 11 nëntor, argument.mk/ – Kryetari i grupit parlamentar të Partisë Demokratike, Gazment Bardhi u shpreh sot se projektligji për financimin e partive politike nuk mund të quhet i përfunduar pa adresimin e plotë të rekomandimeve të OSBE/ODIHR-it dhe Komisionit të Venecias.
Bardhi siguroi se opozita nuk ka bojkotuar asnjëherë Komisionin e Posaçëm për Reformën Zgjedhore.
Ky, sipas tij, “është një fakt publik dhe lehtësisht i verifikueshëm, pasi nuk ka pasur asnjë mbledhje të thirrur të këtij komisioni në të cilën përfaqësuesit e opozitës nuk kanë qenë të pranishëm”.
Nga ana tjetër, Bardhi theksoi se ka një përpjekje të mazhorancës për të devijuar dhe penguar punën e komisionit, duke e zhvendosur vëmendjen drejt çështjeve dytësore, të cilat nuk lidhen me rekomandimet e OSBE/ODIHR-it dhe të Komisionit të Venecias.
“Ky fokusim në çështje që nuk adresojnë standardet për zgjedhje të lira, të ndershme dhe të barabarta po zvarrit procesin dhe po pengon përmbushjen e detyrimeve që ka Shqipëria për garantimin e integritetit të procesit zgjedhor”, shtoi ai.
Për sa i përket projektligjit për financimin e partive politike, Bardhi theksoi se drafti fillestar i hartuar nga Komisioni i Posaçëm i është përcjellë për vlerësim urgjent Zyrës së OSBE/ODIHR-it dhe Komisionit të Venecias.
“Ekspertët e këtyre institucioneve kanë përcjellë opinionet dhe rekomandimet e tyre të plota. Qëndrimi i opozitës është i qartë: të gjitha vërejtjet dhe rekomandimet e tyre duhet të reflektohen plotësisht në tekstin e projektligjit. Ky proces nuk mund të konsiderohet i përfunduar dhe projektligji nuk mund të ecë përpara pa adresimin e plotë të rekomandimeve të OSBE/ODIHR-it dhe Komisionit të Venecias”, shtoi ai.
Bardhi theksoi se opozita do të vijojë të insistojë që Reforma Zgjedhore të përmbushë jo thjesht një detyrim formal apo procedural, por standardet dhe kërkesat e përcaktuara edhe nga Komisioni Europian: rikthimin e besimit të publikut te procesi zgjedhor, garantimin e konkurrencës së ndershme politike dhe mbrojtjen e integritetit të zgjedhjeve.
“Reforma Zgjedhore duhet të prodhojë garanci reale për zgjedhje të lira, të ndershme dhe të barabarta, jo të shndërrohet në një proces formal që shmang adresimin e problemeve themelore të demokracisë zgjedhore në Shqipëri”, tha Bardhi.
