Shkup, 9 maj Zhurnal.mk – Nënkryetari i VLEN, Bekim Qoku, në fjalimin e tij gjatë Kongresit të parë të koalicionit, bëri një përmbledhje të rrugëtimit politik të VLEN-it, duke akuzuar Bashkimi Demokratik për Integrim për monopol politik dhe mungesë të përfaqësimit real të të drejtave të shqiptarëve.
Qoku tha se rrugëtimi nga krijimi i LEN-it e deri te formësimi i VLEN-it ka qenë një proces i vështirë, por i domosdoshëm për reflektim dhe konsolidim politik.
“Që nga ngjizja e LEN-it e deri më sot te VLEN-i, ishte pikërisht ky rrugëtim që na bëri mirë, na nxori në pah dobësitë dhe momentet ku duhej të tejkalonim veten dhe të vetëmohoheshim”, deklaroi Qoku.
Ai theksoi se VLEN është ndërtuar mbi nevojën për ndryshim politik në kampin shqiptar dhe si alternativë ndaj, siç u shpreh ai, monopolizimit shumëvjeçar të skenës politike shqiptare nga BDI-ja.
Sipas Qokut, bashkimi i subjekteve politike brenda VLEN-it përfaqëson një model të ri politik, të bazuar në bashkëpunim, reflektim dhe përfaqësim më të denjë të shqiptarëve në Maqedoninë e Veriut.
