Kryetari i Partisë Demokratike, Sali Berisha gjatë konferencës së sotme me gazetarët akuzoi kryeministrin Edi Rama për manipulim të votës së diasporës përmes ndryshimit të kontratës me DHL dhe përdorimit të nënkontraktorëve.
Berisha u shpreh se, pas thirrjes së Kryeministri Rama më 3 maj ndaj emigrantëve për të marrë zarfe në Greqi, numri i tyre u rrit në mënyrë të dyshimtë.
Kryetari i PD deklaroi se zarfet janë mbushur në zyrat e PS dhe kërkon transparencë nga DHL, e cila, sipas tij, ka refuzuar të japë informacion për procesin e kthimit të zarfeve.
Ai paraqiti fatura të DHL që sipas tij tregojnë se zarfet me vota janë dorëzuar më 10 maj, të gjitha me firma të dyshimta, të cilat ai i përshkruan si “fjongo” apo “viza qesharake”.
“Sot për të tretën herë i rikthehemi farsës, manipulimit, shtetëzimit të votës së diasporës nga Edi Rama. DHL e ndryshoi kontratën në kundërshtim me atë që kishte firmosur me urdhër të Edi Ramës. Pra, ishte Edi Rama vetë personalisht që ka urdhëruar DHL të ndryshojë, të marrë nënkontraktor, gjë të cilën ne nuk e pranonim kurrë”, tha Berisha.
“Më 3 maj, Edi Rama u bën thirrje emigrantëve në Greqi: shkoni dhe merrini vetë zarfet. Menjëherë pas këtij mesazhi të Ramës u rrit ndjeshëm numri i zarfeve të ardhura nga Greqia, ndërkohë që vendet e tjera mbajtën mesataren ditore”, theksoi Berisha.
“Numri i zarfeve të ardhura nga Greqia, mesatarja ditore për periudhën 20 prill- 5 maj ka qenë 1.133 zarfe. Për periudhën 6-9 maj, 5500 zarfe. Për datën 7 maj, 6967 zarfe. Për datën 8 maj, 6967 zarfe. Për datën 9 maj, 3188 zarfe. Për datën 10 maj, 5670 zarfe. Për datën 11 maj, 4415 zarfe”, u shpreh më tej kreu i PD.
Pra, shtoi Berisha, “thirrja e tij bëhet realitet, prishet çdo lloj lidhje me postën, e tëra shtrohet në rrugën e partisë, me mjetet e partisë”.
Kreu i PD nënvizoi se, “procesi i votimit të diasporës është fund e krye një proces i shtetëzuar dhe i manipuluar”.
Ndaj, shtoi ai, “PD nuk do pranojë kurrë këto zgjedhje, ka vetëm një zgjidhje, dhe kjo zgjidhje është qeveria teknike, përsëritja e zgjedhjeve”.
