Kryetari i Partisë Demokratike, Sali Berisha reagoi sot lidhur me pr/buxhetin 2025 që qeveria dorëzoi këto ditë në parlament për vitin 2025.
Në një konferencë për shtyp, Berisha theksoi se, buxheti nuk u përkushtohet qytetarëve, por investimeve kapitale si në diktaturë kur ndërtoheshin bunkerë e tunele.
“Ky buxhet në total prej 8.2 miliardë euro është buxheti më i madh dhe që në pamje të parë duhet të ofronte mirësinë më të madhe për qytetarët shqiptarë”, tha Berisha.
Por, shtoi kreu i PD, “në Shqipëri ka ndodhur një fenomen paradoksal. Rritja e përvitshme e buxhetit gjer pothuajse në dyfishimin e tij është shoqëruar në mënyrë të habitshme me rritjen e përvitshme të varfërisë. Varfërisë relative, varfërisë të skajshme apo mjerimit”.
Sipas tij, kjo dukuri unike është tipar kardinal i buxheteve të diktaturave ideologjike dhe mobokracive kleptokratike.
“Nuk mund të ndodhë kurrë kjo përveçse në regjime ku paratë përdoren siç i përdorte diktatori Hoxha për bunkerë dhe tunele, ose siç i përdor Edi Rama për punë publike me çmime 10 herë më të lartë se në Kroaci”, tha Berisha.
Kështu që, shtoi kreu i PD, “ky buxhet, para se gjithash mund të cilësohet si buxheti i triumfit të kleptokracisë, të vjedhjes, parajsës qeveritare dhe si buxhet pa mëdyshje i ndëshkimit të qytetarëve shqiptarë”.
Sa i përket pensioneve, Berisha u shpreh se, “buxheti parashikon vetëm 16 milionë euro për rreth 800 mijë pensionistë”.
“Janë dy kategori të tjera që në Shqipëri numërojnë kafshatën dhe këta janë 790 mijë pensionistë dhe janë 62 mijë familje në ndihmë ekonomike. Për 62 mijë familje në ndihmë ekonomike, të cilët de facto janë në varfëri ekstreme, nuk shtohet asnjë qindarkë”, tha Berisha.
Berisha shtoi se, “sot çdo pensionist merr minimalisht një pension më të ulët në raport me fuqinë blerëse se sa në vitin 2014”.
“A ka cinizëm, injorim dhe më shumë se injorim që në tërë këtë buxhet të lësh për pensionistët gjithsej 16 milionë euro?
Ndërkohë që ke zvogëluar listën e rimbursueshme dhe prej vitesh nuk ke shtuar asnjë ilaç në fondin e ilaçeve të tyre.
Pra, buxhetin mund t’i japësh shumë etiketa, por më çnjerëzor, Shqipëria nuk ka patur kurrë të tillë”, tha më tej Berisha.
