Shkup, 12 qershor, Zhurnal.mk – Kazinotë, klubet me automatikë dhe organizuesit e lojërave elektronike të fatit do të duhet të jenë të vendosura të paktën 500 metra larg shkollave fillore dhe të mesme. Aktiviteti i tyre i nënshtrohet kufizimeve të rrepta për reklamim, pajisjes së detyrueshme me GPS të çdo aparati loje, garancive bankare më të larta dhe taksave të reja financiare për hapjen e hapësirave të biznesit. Kuvendi miratoi Ligjin për lojërat e fatit dhe lojërat argëtuese. Masat e reja synojnë mbrojtje më të madhe të të rinjve, kufizimin e efekteve negative të kumarit, luftimin e ekonomisë gri dhe forcimin e kontrollit mbi sektorin. Ligji pritet të kontribuojë në siguri më të madhe juridike, rregullim më të mirë të tregut dhe mbrojtje më efikase të qytetarëve.
Sipas ligjit, hapësirat ku organizohen lojëra fati në kazino, klube automatike dhe lojëra elektronike mund të hapen vetëm në distancë prej të paktën 500 metrash nga shkollat fillore dhe të mesme. Për bastoret ka përjashtim, por në pikat e tyre të pagesës brenda këtij rrethi nuk do të lejohen terminale videolotarie apo terminale për lojëra elektronike.
Ligji zgjeron ndjeshëm ndalimet për reklamim. Do të ndalohet reklamimi i lojërave të fatit si mënyrë për arritje personale apo financiare, zgjidhje e problemeve ekonomike ose fitim prestigji shoqëror. Nuk do të lejohen rekomandime nga persona të njohur që sugjerojnë se kumari ka kontribuar në suksesin e tyre. Kufizohet reklamimi në pjesët e jashtme të objekteve dhe ndalohen përmbajtjet që nxisin të miturit të marrin pjesë në lojëra fati.
Një nga risitë më të rëndësishme është detyrimi që çdo aparat loje dhe çdo terminal videolotarie të pajiset me GPS në komunikim elektronik të vazhdueshëm me Drejtorinë e të Ardhurave Publike. Kjo duhet të mundësojë ndjekjen e saktë të lokacionit të pajisjeve dhe të parandalojë vendosjen e tyre tek organizues jo të licencuar.
Ligji heq mundësinë që me një licencë të hapen disa hapësira biznesi. Në vend të kësaj, futen tarifa të reja për çdo pikë pagesash dhe çdo hapësirë biznesi, si dhe garanci bankare më të larta për operatorët.
Në ligj janë përfshirë edhe rekomandimet e MONEYVAL pranë Këshillit të Evropës. Futet kontroll shtesë për pronarët dhe menaxherët e kompanive që organizojnë lojëra fati, me qëllim forcimin e sistemit kundër pastrimit të parave dhe financimit të terrorizmit.
Gjithashtu, mbetet ndalimi për pjesëmarrjen e personave nën 18 vjeç në lojëra fati, ndërsa organizuesit do të jenë të detyruar të vendosin në vende të dukshme paralajmërime për ndalimin e hyrjes së të miturve dhe informacione për parandalimin dhe trajtimin e varësive.
Këto ndryshime kanë shkaktuar reagime të forta nga sektori. Shoqata e Bastoreve Sportive të Maqedonisë (ASOM) dhe shoqata “Dua të punoj” vlerësojnë se me zbatimin e dispozitave ligjore do të mbyllen një numër i madh objektesh legale, rreth 10 mijë të punësuar mund të mbeten pa punë, ndërsa pasojat negative indirekt do të preknin mbi 35 mijë qytetarë.
Sipas tyre, me kufizimin e sektorit legal një pjesë e lojtarëve mund të kalojnë tek organizuesit ilegalë, gjë që do të rrisë ekonominë gri dhe do të ulë të ardhurat që aktualisht derdhen në buxhetin e shtetit. /Zhurnal.mk
