Shkup, 23 qershor, Zhurnal.mk – VLEN ka ngritur akuza të reja lidhur me procesin e furnizimit me gardhe mbrojtëse për rrugët, duke kërkuar nga Prokuroria për Krimin e Organizuar që të verifikojë të gjitha pretendimet e publikuara në opinion për këtë rast.
Në një konferencë për media, Daut Memishi nga VLEN tha se kanë kaluar katër ditë nga publikimi i pretendimeve për këtë çështje, ndërsa, sipas tij, opinioni ende nuk ka marrë përgjigje për pyetjet thelbësore.
Sipas Memishit, fokusi nuk duhet të jetë nëse Ndërmarrja Publike për Rrugë Shtetërore ka shpallur ose jo tender, siç ka argumentuar drejtori Ejup Rustemi, por në pretendimet se një kompani evropiane është lënë jashtë procesit, ndërsa është favorizuar një kompani nga Serbia.
Ai ngriti disa pyetje publike, duke kërkuar sqarime nëse është ushtruar presion ndaj kompanisë evropiane, nëse i është hapur rruga një kompanie serbe dhe nëse kompanitë janë orientuar se prej kujt duhet t’i blejnë gardhet mbrojtëse.
Memishi gjithashtu pyeti pse, sipas tij, Rustemi nuk reagoi menjëherë pas publikimit të artikullit me pretendimet, por vetëm pasi VLEN kërkoi nga Prokuroria e drejtuar nga Islam Abazi që të ndërmarrë veprime.
Në deklaratën e tij, VLEN akuzoi edhe BDI-në për heshtje lidhur me këtë çështje, duke pretenduar se partia nuk ka dhënë përgjigje për dyshimet e ngritura rreth biznesit të gardheve mbrojtëse.
Në fund, Memishi kërkoi që Prokuroria për Krimin e Organizuar të hetojë të gjitha pretendimet e bëra publike, duke theksuar se qytetarët kanë të drejtë të dinë nëse interesi publik është cenuar në favor të interesave biznesore apo partiake.
Agjencia e Lajmeve Zhurnal ishte media e parë që publikoi pretendimet lidhur me procesin e furnizimit me gardhe mbrojtëse, çështje për të cilën tani VLEN kërkon hetim nga Prokuroria për Krimin e Organizuar.
