Shkup, 4 prill – Grupi parlamentar i “VLEN”-it së shpejti do të dalë me propozim-metodologji për liderët e tyre dhe mënyrën e bashkëpunimit në zgjedhjet lokale. Plani që duhet të marrin liderët do të jetë metodologjia për ndarjen e pozitave në listat e këshilltarëve komunal në përqindje, plus pozitat e bartësve të listave dhe kandidatëve për kryetarë komunash. Këtë e deklaroi për MIA-n, deputeti i “VLEN”-it, Riad Shaqiri.
“Si grup parlamentar brenda ‘VLEN’-it kemi pasur dy takime – një joformal dhe një formal, ku kemi diskutuar mundësinë e pjesëmarrjes në zgjedhjet lokale. Në atë takim kemi biseduar për metodologjinë e ndarjes së pozitave në administratën e komunës dhe formën e daljes në zgjedhje. Ka pasur dy forma – një formë e daljes në zgjedhje veç e veç dhe një formë e daljes në aspekt të përbashkët si koalicion. Në tavolinë janë të dyja versionet”, tha Shaqiri.
Deputeti thekson se ka më shumë pajtueshmëri në lidhje me atë që në zgjedhje të shkohet me lista të përbashkëta dhe harmonizim të qëndrimeve për ndarjen e komunave, siç tha ai, “ku janë në përputhje me shtrirjen e subjekteve politike në tërë territorin e Maqedonisë së Veriut si strukturë partiake”.
Ai informoi se javën e ardhshme do të mblidhet grupi parlamentar dhe pritet që të harmonizohen qëndrimet për ndarjen e pozicioneve.
“Nuk kemi ditë të saktë, as datë, as afat. Javën e ardhshme do të kemi edhe një takim. Nuk e dimë saktë se kur do ta caktojmë takimin, varësisht nga aktivitetet e punës së Kuvendit. Javën e ardhshme do të kemi takim dhe shpresoj që të gjitha mediat dhe gazetarët të informohen me kohë”, ka thënë Shaqiri.
Mosmarrëveshjet në “VLEN” dolën në pah kur të gjithë liderët e koalicionit pranuan publikisht se janë të gatshëm për një garë në të gjitha nivelet për zgjedhjet lokale me përjashtim të kryetarit të Aleancës për Shqiptarët dhe ministrit të Shëndetësisë Arben Taravari i cili insistoi që për listat e kandidatëve për këshilltarë të shkohet veç e veç. Ai madje kritikoi efikasitetin e koalicionit duke thënë se 70 për qind e shqiptarëve konsiderojnë se VLEN nuk funksionon mirë dhe nuk ka përfaqësim të kënaqshëm në qeveri.
