Tetovë, 3 qershor – Për të tretën ditë me radhë personeli mjekësor dhe shërbimi teknik i Spitalit klinik të Tetovës mbajtën protestë publike pas revoltës për dy paga të papaguara dhe shkaku se nuk kanë qenë në gjendje të marrin kontrata të reja pune. Ata njëkohësisht po kërkojnë zgjidhje për punësim të përhershëm.
Në protestën e sotme, ata theksuan se do të duhet të gjejnë vende të reja pune nëse problemi nuk zgjidhet së shpejti.
Në pyetjen nëse ulja e numrit të atyre që protestuan është reduktuar për shkak të presionit, ata thanë se nuk e dinë.
“Është individuale, unë doja të vija dhe erdha. Nëse problemi ynë nuk dëgjohet, nuk di çfarë të them, mund të lëmë punën, të rrimë në shtëpi. Aq, dorëzohesh më. Durimi dhe këmbëngulja kanë një kufi. Unë personalisht do të dorëzohem”, tha Magdalena Vellkovska.
Ivona Nedellkovska gjithashtu potencoi se duhet të gjendet një zgjidhje urgjente për statusin e tyre, përndryshe duhet të kërkojnë punë tjetër.
“Të gjithë jemi të zëvendësueshëm, domethënë që askush nuk është i pazëvendësueshëm për fat të keq, ky ishte informacioni dhe sqarimi i drejtorit, ndërsa nëse ne jemi të zëvendësueshëm, domethënë mund të na thonë me kohë se jemi të zëvendësueshëm, largohuni, nuk do të fitoni asgjë, ndërsa jo kështu jeni të zëvendësueshëm, por qëndroni në punë. Unë jam larguar nga puna sepse jam njeri familjar. Nuk mundet familja ime të durojë të shkojë unë në punë pa para, jo vetëm unë, por dhe të gjithë kolegët e mi dhe mendoj se duhet të gjithë të ngritin zërin tani, ndërsa jo të dëgjojnë nga mbrapa”, tha Ivona Nedellkovska.
Përsëri në emër të udhëheqësisë së Spitalit klinik të Tetovës me gazetarët foli kryeinfermierja e Spitalit klinik, Lindita Zaimi. Ajo u tha kolegëve të saj të formojnë një grup pune, por njëkohësisht tha se problemi me kontratat nuk është vetëm në Spitalin klinik të Tetovës.
“Nuk është diçka që varet nga ne, kjo situatë nuk është vetëm në Tetovë, por është në të gjithë vendin. Presim zgjidhje të përhershme, ndërsa jo afatshkurte. Besoj se do të realizohet, do të vazhdojmë të ndjekim kërkesat deri tek ministria dhe sot, si dhe çdo ditë. Këto janë probleme të trashëguara nga më herët, shprehim gatishmërinë dhe vullnetin tonë për të zgjidhur problemin e tyre. Puna për konkursin dhe vendimet është në nivel më të lartë. Për çdo ditë presim vendime dhe konkurse, por nuk u realizuan. Tani po presim vendimin e ministrit të ri”, tha Lindita Zaimi.
