Shkup, 9 qershor – Në botë dhe në vendin tonë 9 Qershori shënohet si Dita Ndërkombëtare e Arkivave, dita kur në Paris në vitin 1948 u formua Këshilli Ndërkombëtar i Arkivave, organizatë e dedikuar për avancimin dhe promovimin e punës arkivore dhe mbrojtjen e materialeve arkivore.
Motoja e Javës Ndërkombëtare të Arkivave, e cila këtë vit zhvillohet nga 9 deri më 13 qershor të vitit 2025, është #ArchivesAreAccessible – Archives for Everyone (Arkivat janë të qasshme- Arkiva për të gjithë!).
Nga Arkivi Shtetëror thonë se kjo temë e cila u përzgjodh përmes anketës globale me pjesëmarrjen e më shumë se 300 profesionistëve, e thekson rolin kyç të qasjes në veprimtarinë arkivore.
“Qëllimi është të inkurajohet të menduarit dhe aksioni për të hapur arkivat për të gjitha bashkësitë, pa dallim vendndodhjes, aftësisë apo përkatësisë së tyre. Në fokusin e bashkësisë arkivore globale është çështja e qasjes së dokumenteve dhe shërbimeve arkivore për të gjithë qytetarët – pa dallim nga statusi i tyre shoqëror, arsimi, mosha, etnia apo aftësitë fizike”, theksojnë nga Arkivi Shtetëror.
Motoja, ashtu siç potencojnë prej atje, e thekson rolin e arkivave si një e mirë publike dhe mjet demokratik që mundëson transparencën, llogaridhënien dhe mbrojtjen e të drejtave të njeriut.
Arkivi Shtetëror informon se po merr pjesë në shënimin e Ditës Ndërkombëtare të Arkivave dhe javës Ndërkombëtare të Arkivave me edukim intensiv arkivor për nxënësit dhe studentët, i mbështet vlerat e hapjes, profesionalizmit dhe shërbimit ndaj publikut dhe vazhdon misionin e saj – ruajtjen, mbrojtjen dhe sigurimin e qasjes në trashëgiminë arkivore të shtetit.
