Kumanovë, 5 nëntor argument.mk/ – Mjeku i njohur, Dr. Shenasi Jusufi, specialist i pediatrisë dhe neonatologjisë, është shpallur një nga fituesit e Çmimit të Nëntorit të Komunës së Kumanovës për vitin 2026, një nga mirënjohjet më të rëndësishme që ndan komuna për personalitetet dhe institucionet që kanë dhënë kontribut të veçantë në zhvillimin dhe afirmimin e qytetit, raporton tvfesta.mk
Dr. Shenasi Jusufi, themelues dhe pronar i institucionit privat shëndetësor “Alfa Medicus”, është përzgjedhur për këtë çmim si vlerësim për punën e tij shumëvjeçare në fushën e shëndetësisë, përkushtimin profesional, si dhe kontributin e tij shkencor dhe humanitar.
Ky vlerësim për Dr. Jusufin vjen si njohje institucionale për angazhimin e tij në mjekësi, veçanërisht në pediatri dhe neonatologji, dy fusha që lidhen drejtpërdrejt me kujdesin shëndetësor ndaj fëmijëve dhe të porsalindurve.
Vendimi për ndarjen e çmimeve është marrë më 4 nëntor nga Komisioni për Shënimin e Festave dhe Manifestimeve, si dhe për Ndarjen e Çmimeve dhe Mirënjohjeve pranë Komunës së Kumanovës.
Sipas të dhënave të publikuara, këtë vit për Çmimin e Nëntorit janë paraqitur gjithsej 23 kandidatura, prej të cilave 16 për individë dhe shtatë për persona juridikë. Pas shqyrtimit të propozimeve, komisioni ka përzgjedhur katër individë dhe tri subjekte juridike.
Në kategorinë e individëve, përveç Dr. Shenasi Jusufit, fitues të Çmimit të Nëntorit për vitin 2026 janë shpallur edhe:
Boshko Tasiq, gazetar sportiv, për angazhimin e tij shumëvjeçar profesional dhe kontributin në zhvillimin, afirmimin dhe promovimin mediatik të sportit në Kumanovë dhe më gjerë.
Marina Cvetanovska-Martinovska, artiste figurative dhe pedagoge, për kontributin e saj krijues dhe profesional në zhvillimin e artit figurativ, si dhe promovimin e Kumanovës në skenën ndërkombëtare artistike.
Stojanka Stojkoviq, sipërmarrëse në pension, për angazhimin shumëvjeçar në zhvillimin e kompanisë “Ekstra Mein” dhe kontributin në forcimin e ekonomisë lokale dhe sipërmarrjes.
Në kategorinë e personave juridikë, Çmimi i Nëntorit do t’i ndahet Shoqërisë Kulturore-Artistike “Pançe Peshev”, e cila këtë vit shënon 100-vjetorin e themelimit, për kontributin në jetën kulturore të qytetit dhe ruajtjen e traditës folklorike maqedonase.
Me këtë çmim do të nderohet edhe kompania “Urbaning” DOO Kumanovë, për dhurimin e dokumentacionit projektues për ndërtimin e objektit të ri bashkëkohor të Shkollës së Mesme “Sami Frashëri”, duke kontribuar në krijimin e kushteve më cilësore për arsimim.
Ndërkaq, Klubi Sportiv i Kikboksit “Predator” nga Kumanova do të vlerësohet për sukseset e arritura në kampionatet shtetërore, evropiane dhe botërore, ku sportistët e tij kanë fituar medalje të rëndësishme.
Kryetari i Komisionit për Ndarjen e Çmimeve, Samet Salievski, ka bërë të ditur se përzgjedhja e fituesve është realizuar pas shqyrtimit dhe votimit të kandidaturave nga anëtarët e komisionit.
Sipas tij, mendimet e anëtarëve nuk kanë qenë të njëjta për të gjithë kandidatët, ndërsa vendimi përfundimtar është marrë përmes votimit.
Fondi financiar i Çmimit të Nëntorit për këtë vit është 100.000 denarë, shumë që do të ndahet mes katër individëve fitues, ndërsa tri subjektet juridike do të marrin diploma dhe mirënjohje.
Çmimi i Nëntorit ndahet tradicionalisht me rastin e 11 Nëntorit – Ditës së Çlirimit të Kumanovës, duke vlerësuar individët dhe organizatat që kanë lënë gjurmë përmes punës dhe angazhimit të tyre në fusha të ndryshme të jetës shoqërore.
Përzgjedhja e Dr. Shenasi Jusufit në mesin e fituesve të këtij viti përfaqëson një vlerësim të rëndësishëm për kontributin e tij profesional, shkencor dhe humanitar në shërbim të shëndetësisë dhe qytetarëve.
