Kryetari i bashkisë së Gramshit, Besion Ajazi u shpreh sot gjatë një konference për shtyp me gazetarët, se ngjarja në kopshtin Nr. 1 publik të këtij qyteti është një rast që po hetohet nga institucionet përkatëse.
Kryetari i bashkisë së Gramshit tha se “nuk është vërtetuar fakti që helmimi erdhi nga ushqimi”. Sipas tij, bashkia mban gjithë përgjegjësitë për pjesën që i takon.
“Përgjegjësia jonë është në momentin që bëhet furnizimi me produkte ushqimore, ne si institucion kërkojmë fletën e analizave për çdo ushqim dhe nuk ka asnjë rast që të jetë pranuar ndonjë produkt ushqimor pa fletë analize. Më intereson shumë gjendja shëndetësore e fëmijëve, më intereson gjendja shpirtërore e prindërve të tyre, nuk më intereson asgjë tjetër që nuk lidhet me këtë rast”, tha Ajazi.
“Në ditët e fundit është shfaqur një rast, më pas u bënë dy, gjashtë fëmijë nga i njëjti kopsht që morën ndihmë mjekësore në spitalin e Gramshit. Kjo na vuri në alert. Dua që nëpërmjet jush të sqaroj disa të pavërteta të mëdha në këtë histori tollovitje portalesh, nuk kemi të bëjmë me 72 raste helmimi, as me 72 fëmijë të shtruar apo helmim për shkak të ushqimit, sepse ende nuk kemi përgjigjen e analizave”, vijoi ai.
Ajazi përgënjeshtroi lajmet në medie, sipas të cilave ushqimi në këtë kopsht shërbehet me katering, ndërsa tha se gjithçka gatuhet në ambientet e kopshtit, me produkte ushqimore që kanë certifikatën e sigurisë dhe brenda të gjitha kushteve higjieno-sanitare.
“Ushqimi nuk funksionon me katering, por me furnizim nga një kompani dhe me gatim në ambientet e kopshtit me kuzhinier, që prej vitesh ushqejnë vogëlushët. Ky është rasti i parë që ka ndodhur. Nuk e dimë ende se çfarë ka ndodhur, sepse vijon hetimi. Jemi në alert për gjendjen shëndetësore të vogëlushëve. Fatmirësisht nuk kemi të bëjmë me një rast masiv”, pohoi Ajazi, ndërsa theksoi se grupet e ISHP-së dhe ato epidemiologjike janë në terren dhe po merren me depistimin dhe hetimin epidemiologjik të rastit.
Ndërkohë prindërit kanë shprehur shqetësimin e tyre lidhur me këtë ngjarje, duke kërkuar hetim për rastin.
Në një deklaratë për mediat, të mbledhur përpara bashkisë së Gramshit, një prej tyre shprehet se këtu duhet të ishte mbledhur i gjithë Gramshi, pasi nuk është çështje politike, por shëndeti dhe jeta e fëmijëve.
“Në çdo rast, dhe për diçka të vogël, po të shkojmë në spitalin e Gramshit, vjen automatikisht Policia. Nuk e dimë çfarë kushtesh higjieno-sanitare kishte kuzhina, të paktën të ishte rrethuar nga policia. Të ishin marrë provat dhe të fillonte hetimi. Provat janë marrë të shtunën nga AKU”, tha një prind.
Një tjetër prind pohon se fëmija i ka rezultuar pozitiv me salmonelë, ndërkohë që ka marrë mjekimin e duhur sipas udhëzimeve të mjekëve.
“Kam një fëmijë që ka dalë pozitiv. Përgjigjen e kam marrë dje. Nga ana e tyre s’kemi parë asnjë gjë dhe përderisa është sëmundje ngjitëse, duhet që të na thuhej se duhet të merrnin masa. Asnjë gjë zyrtare, as nuk na kanë pyetur se si është fëmija. Kam marrë një mjekim duke folur me një doktoreshë. Ne kërkojmë të zbardhet e drejta e kësaj. Nuk duam as të përfitojmë asnjë gjë”, pohoi një tjetër prind.
Specialistët e hetimit të krimit në Komisariatin e Policisë së Gramshit referuan në Prokurori materialet procedurale, pasi më parë u mor informacion nga rrjetet sociale se disa fëmijë të Kopshtit Nr. 1 në Gramsh janë helmuar me salmonelë.
Policia bën të ditur se në cilësinë e provës materiale janë sekuestruar kartelat klinike të 6 pacientëve të shtruar në spital, procesverbalet e kontrollit dhe furnizimit me produkte ushqimore të Kopshtit Nr. 1, si dhe mostrat nga ushqimi, të cilat do të analizohen më tej në laborator.
Gjithashtu, janë bllokuar produktet ushqimore të mbetura në kuzhinën e kopshtit, në kuadër të hetimeve që po zhvillohen nën drejtimin e Prokurorisë së Juridiksionit të Përgjithshëm Elbasan.
Po ashtu dhe Autoriteti Kombëtar i Ushqimit (AKU) njoftoi dje se ka kryer të gjitha veprimet procedurale teknike dhe ligjore në lidhje me raportimet në media mbi një situatë të ndodhur në Kopshtin Nr. 1 në qytetin e Gramshit.
