Paris, 29 qershor, Zhurnal.mk – Franca regjistroi rreth 1 000 vdekje shtesë, javën e kaluar gjatë kulmit të valës rekord të të nxehtit, njoftoi sot agjencia kombëtare e shëndetit publik, raportoi AP.
Sipas autoriteteve, vetëm gjatë tri ditëve më të nxehta u regjistruan mbi 1 200 vdekje të mërkurën dhe më shumë se 1 400 të enjten e të premten, ndërsa para valës së të nxehtit vendi regjistronte mesatarisht 900–1000 vdekje në ditë. Rreth 85% e viktimave ishin mbi 65 vjeç.
Ndërkohë, temperaturat rekord vijuan të thyenin kufijtë në Evropë. Gjermania regjistroi 41,7 gradë Celsius, Polonia 40,5 gradë Celsius, ndërsa Çekia arriti rekordin historik prej 41,9 gradë Celsius.
Drejtori i Përgjithshëm i Organizatës Botërore të Shëndetësisë, Tedros Adhanom Ghebreyesus paralajmëroi se Evropa, është kontinenti që po ngrohet më shpejt në botë, me ritëm dy herë më të lartë se mesatarja globale.
Sipas tij, mbi 150 milionë njerëz po përballen me temperatura ekstreme dhe që nga 21 qershori janë regjistruar më shumë se 1 300 vdekje të lidhura me të nxehtin.
Një studim i publikuar nga “World Weather Attribution” arriti në përfundimin se, vala rekord e të nxehtit, nuk do të kishte qenë e mundur pa ndryshimet klimatike.
Temperaturat e larta shkaktuan gjithashtu zjarre në pyje në Gjermani, dëmtime në rrugë dhe hekurudha, ndërsa në Berlin policia përdori topa uji për të freskuar banorët dhe turistët pranë Portës së Brandenburgut.
