Shkup, 20 nëntor – Shkupjanët thithin ajër të ndotur, nuk kanë autobusë, qyteti po fundoset në pisllëk, ndërsa Qyteti i Shkupit shpalli tender për tingullin e Sallës Universale të djegur. Këtë sot e ka shkruar në profilin e tij në Facebook, kryetari i organizatës së qytetit të Lidhjes Socialdemokrate (LSDM), Gjorgi Galetanovski, duke e shpallur njëkohësisht kontratën për prokurim publik nga administrata e qytetit.
“Salla Universale është mbuluar me hi, Kopshti Zoologjik s’merr dot frymë. Kjo është jeta e përditshme në Shkup. Çfarë po bën pushteti lokal i qytetit, Këshilli i Qytetit dhe kryetarja e Shkupit. Asgjë”, thotë ai.
Ai theksoi se pushteti i qytetit është i papërgjegjshëm për shkak të vendimit të fundit për shpalljen e tenderit për pajisje teknike, zërim dhe ndriçim në Sallën Universale, në vlerë prej afro 2,5 milionë denarë.
“Një prokurim i tillë publik me peshë gati 2.5 milionë denarë është shpallur sot dhe tashmë është i disponueshëm në Byronë e Prokurimit Publik. Kjo nuk ka asnjë logjikë të shëndoshë dhe asnjë kuptim. A s’ju vjen pak keq. Mos bëni festë në kurriz të banorëve të Shkupit”, thotë Galetanovski.
Ai bëri thirrje që tenderi të ndërpritet menjëherë dhe paratë e banorëve të Shkupit të kalojnë në inverterë ose në ndihmë të kopshtit zoologjik të Shkupit.
Nga LSDM kërkuan që t’i shqyrtohen prioritetet e pushtetit të qytetit dhe mjetet e qytetarëve të Shkupit t’i drejtojë për zgjidhjen e problemeve reale të qytetit.
