Tetovë, 21 janar – Nga 80 deri në 100 persona në ditë kërkojnë ndihmë mjekësore në repartin Infektiv në Tetovë, si pasojë e gripit. Simptomat më të shpeshta janë temperatura dhe kolla, thotë infektologu, Borçe Zafiroski, i cili rekomandon që të evitohen sa më shumë ambientet e mbyllura me shumë njerëz, me qëllim që të mos shpërndahet gripi.
“Pas vitit të ri, kemi rritje të pacientëve me infeksione respiratorë të organeve të epërme, dhe flitet kryesisht për viroza, dhe besojmë se flitet për infeksione të gripit. Sipas raporteve ditore në 24 orë numri i personave që kërkojnë ndihmë është mes 80-100, por edhe me simptoma të tjera. Por nga ky numër mbi 80 për qind janë viroza. Rekomandohet sa më tepër ajrosje të ambienteve dhe vitamina e pije të ngrohta më shumë”, deklaroi Borçe Zafiroski. Infektolog.
Situata nuk është më e mirë as në repartin e fëmijëve.
“Sa i përket virusit të gripit, numri i pacientëve është mjaftë i rritur, me çka vetëm për muajin dhjetor shkon deri në 1115 kontrolle nga të cilët u shtruan 150 pacientë, ndërsa në janar, deri ditën e sotme shkon 887 ndërsa të shtruar kemi 142 pacientë. Fëmijët i kemi më tepër me simptomë gripi, si temperatura të larta, kollitje dhe vjedhje”, u shpreh Merita Elezi Rustemi, mjeke.
Nga Sektori për Arsim i komunës së Tetovës kanë njoftuar se, si pasojë e gripit fillimi i gjysmë vjetorit të dytë nëpër shkollat fillore të Tetovës, ka nisur me mbi 250 nxënës më pak.
