Siria ka “gëluar” gjatë orëve të fundit, teksa nga vendi raportohet se është larguar presidenti sirian Bashar Al Assad dhe grupet opozitare kanë marrë nën kontroll vendin.
Mediat ruse raportuan më herët se Bashar Al Assad ka mbërritur në Moskë, ku dhe ka kërkuar azil.
Ndërsa, tashmë po mediat në Rusi kanë publikuar pamje të Assadit në Moskë, bashkë me familjarët e tij. Assad shfaqet i mërzitur dhe i shqetësuar në fotot që janë publikuar në rrjet.
Vetë Bashar Al Assad ka qenë prej më tepër se 24 vite president i Sirisë, ndërsa familjarë të tij kanë drejtuar vendin për më tepër se 50 vite. Moska në një reagim ka deklaruar se “po përpiqet të gjejë një dialog me qeverisjen e re siriane”.
Për ngjarjet në shtetin sirian ka reaguar edhe presidenti amerikan Joe Biden. Ai tha se një epokë e re po nis për popullin e vuajtur sirian, duke shtuar se SHBA do diskutojë me grupet opozitare për një qeverisje sa më të mirë në shtetin sirian.
