Librazhd, 24 shkurt – Bllokimi i aksit Librazhd-Përrenjas ka bërë që prej ditësh dhjetëra kamionë me destinacion Shqipërinë të mbeten në pikën e kalimit kufitar të Qafë-Thanës.
Në kushtet kur e kanë të pamundur të aksesojnë Tiranën dhe e vetmja rrugë alternative u mbetet tranziti përmes Maqedonisë së Veriut çka kërkon një marrëveshje mes dy vendeve fqinjë si edhe procedura dhe kosto shtesë drejtuesit e kamionëve kanë mbetur në kufi në pritje të zgjidhjes së situatës.
“U bë kaq kohë presim, kemi që të dielën po presim këtu, koha është e ftohtë. Duhet të hapet rruga që të çojmë ngarkesën. Po na mbaron ushqimi, sot me sa shoh është vakti i fundit se na mbaroi edhe buka edhe uji”.
-Sa mall keni?
“Atë nuk e di unë e di firma. Ne kemi problem të madh sa të na hapet rruga e të ikim.”
“Kemi rreth 1 javë që presim. Na vjen keq por kemi familje. Unë kam 1 fëmijë 2 vjeç. Domethënë fiks u bënë 4 ditë dhe po na mbaron ushqimi, uji, e me sa di unë edhe 1 vakt kam e më pas do pi dhe kafen e fundit. Rrimë shtrirë brenda në kamion por edhe nafta po na mbaron, duhet të ikim poshtë të marrim naftë. Të presësh në këto kushte është e vështirë. Nga këtu do ikim në Durrës e me lejen e Zotit dalim nga Shqipëria sa të hapet rruga.”
Ndërkohë, efekti është ndjerë edhe në transportin e udhëtarëve. Operatorët kanë rritur çmimin e biletave, duke argumentuar se devijimet në rrugë më të gjata dhe koha shtesë e udhëtimit kanë rritur kostot operative.
