Shkup, 7 maj – Kreu i Lëvizjes Besa dhe njëri nga krerët e VLEN, Bilall Kasami në një intervistë për Ora24.tv, ka konfirmuar edhe njëherë se vendimi i VLEN-it dhe kryeminsitrit pas takimit të mbrëmshëm është që ASH-ja dhe Arben Taravari të largohen nga Qeveira.
Sipas Kasamit, nuk ka vend në Qeveri për njerëz dhe individ që bashkëpunojnë me BDI-në.
“E kemi thënë edhe herave tjera dhe vazhdojmë të qëndrojmë në ato pozicione që bashkëpunim me BDI-në dhe Qeveri nuk ka. Këtë çështje e sqaruam edhe njëherë në takimin e mbrëmshëm me kryeministrin, ku bashkërisht u dakorduam që nuk mundet të vazhdojë të jetë pjesë e Qeverisë asnjë subject politik i cili bashkëpunon me një parti të inkriminuar në krim, korrupsion dhe keqpërdorim të detyrës zyrtare”, ka thënë Kasami.
Sipas Kasamit, nëse kanë pak dinjitet zyrtarët e partisë së Taravarit duhet të tërhiqen dhe nuk do të presin që të shkarkohen. Kasami foli edhe për riformatimin e Qeverisë.
“Nëse kanë pak dinjitet, në situatën e krijuar, ata duhet të largohen sepse vet më së miri e dinë që në çfarë rruge i ka future kryetari i partisë por nëse nuk tërhiqen sigurisht që në ditët në vijim do të ketë veprim në drejtim të do kisha thënë të ri-formatimit të Qeverisë për të rikonfiguruar pozicionet në Qeveri”, deklaroi Kasami.
Zbuloi se janë në bisedime me disa parti dhe deputet po edhe atë se janë në bisedime edhe me zyrtarë të ASH-së të cilët në të ardhmen mund të mbeten në VLEN.
“Për momentin ajo që është biseduar është që të ket ri-konfigurim vetëm të pozicioneve të cilat i ka ASH-ja, janë disa kombinatorika, fillimisht ka bisedime do të kisha thënë anëtarë të ASH-së të cilët janë pjesë e Qeverisë që nga deputetët dhe pozicione të ndryshme në ekzekutiv të cilëve ne u kemi ofruar dhe jemi në bisedime për të vazhduar, të mbajnë ata pozicione, poashtu kemi bisedime edhe me parti dhe deputet të tjerë me të cilët jemi në bisedime për të qenë pjesë e ekzekutivit. Pra, nga momenti I vendimit formal të largimit të ASH-së nga Qeveria do të dihen edhe kombinatorikat se kush do të vijë në pozicionet të cilat i ka sot, ASH-ja e Arben Taravarit’, përfundoi Kasami.
