Një ditë më parë situata në Shëngjin ishte mjaft e vështirë për shkak të përhapjes së jashtëzakonshme të flakëve të zjarrit që rrezikuan banorët dhe banesat, por edhe jetën e zjarrfikësve. Shefi i Zjarrfikësve të Rrëshenit, Agim Lleshaj, i cili prej më shumë se 48 orësh ndodhet në Shëngjin për t’i ardhur në ndihmë bashkisë në vënien nën kontroll të situatës, rrëfeu në “Dita Jonë” rrezikun me të cilin u përballën një ditë parë. Agim Lleshaj tha se ka pasur shumë raste kur iu është vënë në rrezik jeta dhe janë detyruar të braktisin automjetin.
“Bashkia e Mirditës kishte 48 orë në ndihmë të Bashkisë së Lezhës. Në fillim e kishim nën kontroll situatën, por nga fillimi i erës situata u bë agresive dhe doli jashtë kontrollit pavarësisht s kishim automjete e personel nga të gjitha bashkitë. Vendi i rrezikshëm dhe me bimësi rrezikonte jetën. Ishte i vështirë menaxhimi i banesave. Kemi pasur shumë raste kur na është vënë jeta në rrezik. Kemi pasur raste që kemi braktisur automejtin por jemi rikthyer pas 5 minutash”.
Nuk di të përcaktojë shkakun e zjarrit, por Lleshaj thotë se baza logjistike në vendin tonë lë shumë për të dëshiruar. Sipas tij këto situata janë të vështira për t’iu menaxhuar edhe nga shtete më të mëdha.
“Kapacitetet për të tilla nuk besoj që i kanë edhe shtete më të mëdha se ne, por janë situata të vështira të pamenaxhueshme. Bazë kryesore e funksionimit tonë është logjistika kjo lë për të dëshiruar në të gjitha bashkitë. Janë shumë bashki që vuajnë që e kanë bazën logjistike amortizuar. Shuarja e zjarrit me mjete rrethanore kryhet në ato vende ku duhet të ecim shumë më këmbë dhe nuk mund të ngarkohesh me 20-25 litra ujë, kur nuk jep efekt fare. Kjo vatër është krijuar para 5 ditësh. Ka nisur në Torovicë dhe nga era ka kaluar në Shëngjin. Shkakun nuk di ta përcaktoj, nuk kam qenë ë vendngjarje kur ka nisur”.
Situata në Shëngjin aktualisht është duke u monitoruar dhe sipas Lleshajt kjo do të zgjasë 3-4 ditë. Ai vlerëson ndihmën me helikopter nga ajri, pasi godet epiqendrën e vatrës ku zjarrfikësit nuk mund të ndërhyjnë.
“Ndihma nga ajri na ndihmon shumë se i jep goditjen e parë ku është vatra e përqendruar se ne përqëendrohemi në rrethina të vatrës. Situata nën kontroll po monitorohet se mund të ketë riaktivizime dhe ku krijohet vatra ndërhyhet menjëherë mund të shkojë 3-4 ditë monitorimi. Kanë dalë të gjitha forcat e Mbrojtjes dhe 25 mjete zjarrfikëse nga të gjitha bashkitë. Do të bëhet plan ndërhyrje dhe kontrolli, por ne do të futemi më shumë me forca tokësore në themel të vatrave të vogla. Po bëjmë planin e shpërndarjes dhe ndërhyrjes së forcave”.
