Ronald Araujo pritet të mbetet pjesë e Barcelonës edhe në sezonin 2025/26 dhe të luajë një rol të rëndësishëm në formacionin e trajnerit Hansi Flick.
Sipas “Mundo Deportivo”, klauzola aktuale e lirimit për mbrojtësin uruguaian, që është 60 milionë euro, do të skadojë në fund të ditës së martë, më 15 korrik 2025.
Që nga data 16 korrik, klauzola e tij do të rritet në mënyrë të konsiderueshme, duke kapur shifrën marramendëse prej 1 miliard eurosh, një masë që do ta blindojë praktikisht lojtarin në “Camp Nou”.
Vetë Araujo ka shprehur qartë dëshirën për të qëndruar te Barcelona, duke hedhur poshtë çdo spekulim për largim gjatë kësaj vere.
Në sezonin 2024/25, qendërmbrojtësi bëri 25 paraqitje zyrtare për Barçën, duke kontribuar me dy gola dhe dy asistime, dhe duke qenë një nga liderët në prapavijë.
Për shërbimet e tij ishin të interesuara disa klube të mëdha evropiane, përfshirë Manchester United, Chelsea, Juventus dhe Bayern Munich, por asnjëra nuk arriti të bindë as lojtarin dhe as klubin katalanas.
Rritja e klauzolës dhe vendosmëria e lojtarit e konfirmojnë që Araujo do të jetë pjesë kyçe e projektit të ri të Barcelonës për sezonin e ardhshëm.
