Shkup, 31 gusht, argument.mk/ – Përmes dy thirrjeve publike, njësive të vetëqeverisjes lokale u janë vënë në dispozicion mbi 18,4 miliardë denarë nga krediti hungarez për realizimin e projekteve infrastrukturore dhe kapitale, informoi sot në konferencë për shtyp deputeti i VMRO‑DPMNE, Zoran Kocevski.
Sipas Kocevskit, me thirrjen e dytë publike Qeveria vazhdon me mbështetjen për komunat dhe nxit një cikël të ri investues për përmirësimin e kushteve të jetesës së qytetarëve.
“Me dy thirrjet Qeveria u vuri në dispozicion 18 miliardë e 449 milionë denarë nga krediti hungarez njësive të vetëqeverisjes lokale për realizimin e projekteve infrastrukturore dhe kapitale me rëndësi të drejtpërdrejtë për qytetarët”, theksoi Kocevski.
Ai sqaroi se shteti i siguron mjetet financiare, ndërsa vetë komunat i propozojnë projektet sipas nevojave të popullsisë lokale.
Si shembuj konkretë, Kocevski përmendi ndërtimin e një kopshti fëmijësh në Inxhikovo dhe një salle sportive në Çreshevo (Gazi Babë), rikonstruksionin e sallës sportive “Rabotniçki” (Qendër), mbrojtjen e shtratit të lumit Serava (Butel), si dhe ndërtimin e rrjetit të ujësjellësit dhe atmosferik në “Dijonska” (Çair) dhe rikonstruksionin e Çarshisë së Vjetër në Gjevgjeli.
Ndër projektet e tjera janë edhe një garazh me kate në Ohër, një pishinë moderne në Kavadarci, ndërtimi i një gjimnazi në Tetovë, rrjeti sekondar i gazsjellësit në Kumanovë dhe një central fotovoltaik në Konçe.
“Pikërisht investime të tilla kanë efektin më të drejtpërdrejtë mbi jetën e përditshme të qytetarëve, sepse ata çdo ditë i përdorin rrugët, shkollat, institucionet publike dhe infrastrukturën komunale”, tha Kocevski.
Ai shtoi se qëllimi i Qeverisë së udhëhequr nga VMRO‑DPMNE është të sigurojë zhvillim të barabartë në të gjitha komunat, veçanërisht në mjediset më të vogla që kanë buxhete të kufizuara për investime kapitale më të mëdha.
