Për më shumë se tri orë është intervistuar nga Prokuroria Speciale e Kosovës koordinatorja e Komiteteve të Vetëvendosjes, Dejona Mihali. Pas daljes nga Prokuroria, Mihali tha se ka ardhur “për t’i ndihmuar Prokurorisë Speciale”.
“Nga prokurori u intervistova për ta zbardhur të vërtetën.”, – u shpreh Dejona Mihali nga Vetëvendosja.
Mihali nuk pranoi t’u përgjigjet gazetarëve se për cilat raste është intervistuar. Prokuroria Speciale gjatë ka bërë të ditur se Dejona Mihali është intervistuar në cilësinë e dëshmitares për disa çështje penale, të cilat kjo Prokurori i ka në hetim.
Ndërkohë, kryetari i Aleancës për Ardhmërinë e Kosovës, Ramush Haradinaj, e ka lidhur intervistimin e Mihalit me “mafian energjetike”.
“Po i ngushtohet rrethi “mafisë energjetike”. Veprimet e fundit të drejtësisë në Kosovë po i japin shpresë popullit për fuqinë e ligjit mbi të gjithë. “mafia energjetike” duhet të përballet me ligjin. Shteti ligjor dhe demokracia nuk dorëzohen para strukturave të dyshimta kriminale. Po i ngushtohet rrethi.”, ka shkruar Haradinaj në rrjetet sociale.
