Shkup, 25 qershor, Zhurnal.mk – “Nëse do të mbyllnim sytë, do të kishim 80 shtete brenda këtij shteti”, deklaroi kryetari i Gjykatës Kushtetuese, Darko Kostadinovski, duke arsyetuar vendimin lidhur me riemërtimin e rrugëve dhe objekteve infrastrukturore në Tetovë. Sipas tij, nëse Gjykata do të lejonte të anashkaloheshin procedurat ligjore dhe miratimet e nevojshme, do të krijohej një precedent i rrezikshëm që mund të ndiqnin edhe komunat e tjera, gjë që do të çonte në anarki juridike.
Kostadinovski theksoi se iniciativa nuk është dorëzuar para 19 vitesh, por vitin e kaluar, duke nënvizuar se rasti hap një çështje thelbësore për sundimin e ligjit.
“Ajo që dua qytetarët ta dinë është se me shumë vendime tona politikanët shpesh manipulojnë dhe gënjejnë. Dhe këtë e bëjnë pa skrupuj. Ky vendim, si edhe shumë të tjera që Gjykata Kushtetuese ka marrë me rëndësi më të lartë shoqërore – si ‘balanceri’, ligji për tatimin solidar, Kodi Penal, Kodi Zgjedhor hap një pyetje kruciale: Çfarë shteti duam të ndërtojmë? A duam të ndërtojmë një shtet modern, evropian, funksional, juridik, apo të mbetemi në atë që ka qenë për dekada një shtet ‘pseudo‑juridik’? Çfarë është shtet ‘pseudo‑juridik’? Është shtet kur politika është mbi gjithçka, mbi Kushtetutën, politikanët mbi institucionet, politikanët vendosin për të drejtat e qytetarëve, pushteti është tek politikanët. Ne duam të jetojmë ndryshe, dhe unë si kryetar i Gjykatës Kushtetuese jam për rezistencë ndaj këtyre tendencave. ‘Ditë e zezë për shqiptarët’, kemi rrëzuar postulatet e Marrëveshjes Kornizë… Nëse Gjykata Kushtetuese do të lejonte një vendim të tillë përmes prizmit etnik, kur është thjesht juridik a keni miratim nga Qeveria? Nuk keni, mbaroi! Imagjinoni sikur të mbyllnim sytë, atëherë do të kishim 80 shtete brenda shtetit, 80 komuna që do të thoshin: ju keni vendosur praktikë kushtetuese, edhe ne mundemi, nuk na duhet miratim as për planet urbanistike, as për riemërtim… kjo është anarki juridike”, deklaroi Kostadinovski.
