Janë përuruar investimet në Shkollën Fillore dhe të Mesme e Ulët, “Metush Krasniqi” në Roganë të Komunës së Kamenicës, me çrast mori pjesë kryeministri i Kosovës, Albin Kurti.
Kurti, për këto investime të bëra në vlerë prej 1 milion euro, në pjesën e jashtme si dhe në inventor, tha se do të krijojnë kushte të shkëlqyera për 197 nxënësit, si dhe stafin prej 39 punonjësve arsimorë dhe profesionalë.
Tutje shtoi më tej ai, MAShTI dhe Komuna e Kamenicës do të ndërtojnë në këtë komunë edhe dy çerdhe të reja, përfshirë një në Roganë dhe tjetra në Koretinë në vlerë prej 741 mijë euro, e cila është duke u ndërtuar dhe pritet të hyjë në funksion shumë shpejt.
Pas prerjes së shiritit dhe përfundimit të fjalës, kryeministri Kurti pa nga afër ambientet e brendshme, ekspozitën me punimet e nxënësve të shkollës të prezantuara në hollin e kësaj shkolle si dhe kabinetet ku ndoqi performancën e nxënësve.
Ndërsa, pjesë e përurimeve ishte edhe Ministrja e Arsimit, Shkencës, Teknologjisë dhe Inovacionit, Arbërie Nagavci.
“Jemi sot bashkë këtu, është kënaqësi po aq sa edhe përgjegjësi; kënaqësi, sepse po përurojmë objektin e ri të shkollës “Metush Krasniqi” dhe përgjegjësi, sepse si Qeveri dhe Ministri mundohemi që të kryejmë më së miri detyrën tonë duke qenë pranë jush dhe krijuar kushte për arsim cilësor”, tha Nagavci.
Ndërkaq, Kryetari i Komunës së Kamenicës, Kadri Rahimaj, tha se fokus i kësaj komune do të mbetet arsimi, prandaj edhe investimi në këtë shkollë ka qenë i domosdoshëm.
