Shkup, 24 shkurt – Bashkëpunimi i ndërsjellë mes Odës Ekonomike të Maqedonisë dhe Ministrisë së Arsimit ka bërë një revolucion në arsim përmes zbatimit të platformës “Mësimi Dual”, konstatuan mes tjerash të pranishmit në konferencën e Organizuar nga Oda Ekonomike në temën “Fuqia e Arsimit Dual”.
Sipas organizatorëve, Oda Ekonomike ka pasur tre prioritete kryesore, ku njëra prej tyre ka qenë “Prodhimi i fuqisë punëtore ose kuadër për kërkesat e sektorit të biznesit”, dhe me zbatimin e projektit Arsimi Dual, sipas përfaqësuesve të Odës Ekonomike ky prioritet është plotësuar.
Sipas kryetarit të Odës Ekonomike, Branko Azeski, mësimi dual bashkon aspektin teorik në shkollë dhe atë praktik në kompani.
“Të krijojmë një simbiozë, e cila është e nevojshme për biznesin dhe nevojat e saja për kuadër, që mund të futet në tregun e punës menjëherë dhe në tregun e prodhimtarisë. Nëse nuk do të ishin krizat ekonomike, financiare, shëndetësore, dhe energjetike në vitin 2008 dhe deri më sot, është konstatuar se problemi më i madh i sferës së biznesit do të jetë aspekti kadrovik.”, – deklaroi kryetari i Odës Ekonomike, Branko Azeski.
Ministrja e Arsimit dhe Shkencës, Vesna Janevska, në fjalimin e saj, mes tjerash theksoi se promovimi dhe prezantimi i rezultateve dhe aktiviteteve në procesin e zbatimit të arsimit dual, tregon më se miri për sukseset e arritura në këtë drejtim.
Ajo poashtu u ndal edhe në ndryshimet e reja, të cilat do të preken me propozim-ligjin e ri për arsimin e lartë.
“Ligji i ri për Arsimin e Lartë parasheh studime profesionale me nga 180 kredi, që do të përfshihen në ciklin e parë të studimeve, pastaj cikli i dytë i studimeve profesionale që po sillet në vendin tonë për herë të parë, dhe do të ketë edhe cikël të tretë të studimeve profesionale po ashtu për herë të parë në vendin tonë. Përveç kësaj, ligji parasheh studime të shkurta plotësuese profesionale për specializim në sfera të caktuara. Kjo ishte e kërkuar nga komuniteti i biznesit, dhe i nxjerrë si konstatim nga rezultatet e mira të cilat po i jep mësimi dual, ku parasheh mësim dhe punë, por ishte kërkesë edhe e disa fakulteteve, gjë e cila është në vendet e BE-së, por jo edhe në vendin tonë.”, – theksoi ministrja e Arsimit dhe Shkencës, Vesna Janevska.
Sipas të pranishmëve, rezultatet e mësimit dual janë impresive. Në periudhën nga viti 2020 deri në vitin 2025, numri i kompanive të përfshira nga mësimi dual është rritur nga 61 në 900 kompani.
Numri i shkollave që ofrojnë mësimin dual është rritur nga 8 në 65, ndërsa numri i paraleleve në mësimin dual është rritur nga 11 në 875 paralele.
Sipas këtyre numrave, sot 13.500 nxënës janë përfshirë në mësimin dual në 130 kualifikime dhe në 14 sektorë të ndryshëm.
