Shkup, 2 shtator argument.mk/ – Në ditët me temperatura të larta, mësimi në shkolla duhet të përshtatet me kushtet e motit dhe të zhvillohet në përputhje me protokollet për përballimin e vapës. Kështu u shpreh ministrja e Arsimit dhe Shkencës, Vesna Janevska, duke thënë se këto protokolle tashmë janë publikuar në ueb-faqen e ministrisë dhe u janë dorëzuar të gjitha shkollave. Sipas saj, ndryshimet klimatike janë një sfidë me të cilën përballen fëmijët në të gjithë Evropën dhe botën, por kjo nuk duhet të jetë pengesë për zhvillimin e mësimit, tha ajo.
“Por, kjo nuk do të thotë që fëmijët tanë nuk duhet të mësojnë. Ajo që duhet bërë është të respektohen protokollet. Sigurisht, udhëheqësia e shkollës dhe vetë mësuesit, kjo është pjesë e punës së tyre, do të përshtaten me kushtet. Nëse është vapë, ata nuk do të bëjnë ushtrime fizike, do të kenë pushim, art, muzikë, diçka tjetër. Nuk dua të ndërhyj në punën e tyre, por ja një ide. Nëse është më ftohtë, ata do të bëjnë edhe disa ushtrime fizike. Aty në protokollet shkruan se kur duhet të hapen dhe mbyllen dritaret, cilat aktivitete duhet të bëjnë fëmijët. Duhet të përshtatemi me gjithçka që do të jetë sfidë.”, – deklaroi ministrja e Arsimit dhe Shkencës, Vesna Janevska.
Në pyetjen nëse shkollat do të pajisen me kondicionerë për ditët e nxehta në fillim dhe në fund të vitit shkollor, ministrja Janevska tha se ato do të sigurohen kur shteti të ketë mundësi t’i pajisë të gjitha shkollat. Sa i përket mbylljes së shkollave dhe optimizimit të klasave, Janevska tha se bëhet fjalë për reforma të dhimbshme, por të nevojshme. Sipas saj, nuk është në interes të fëmijëve të mësojnë të izoluar në grupe të vogla, pasi kjo pengon socializimin, motivimin dhe zhvillimin e tyre.
“Është në interes më të mirë të fëmijëve të jenë në një grup më të madh, është në interes më të mirë të fëmijëve të zhvillojnë empati, të mësojnë si të zgjidhin problemet, të shohin kushte më të mira shkollore, të shohin një tabelë inteligjente, të marrin një tabletë, të krijojnë miqësi me fëmijë të tjerë që janë të ndryshëm nga ta, të mësojnë të respektojnë njëri-tjetrin. Ka shumë arsye pse duhet ta bëjmë këtë. Është detyra ime ta bëj këtë, sepse nëse nuk e bëj, duke mos e bërë po dëmtoj të gjithë shoqërinë, kryesisht fëmijët. Duhet ta kishim filluar këtë proces shumë më herët, në mënyrë që të mos ishim në një situatë kaq kritike.”, – theksoi ministrja e Arsimit dhe Shkencës, Vesna Janevska.
Të gjitha këto, Janevska i tha gjatë vizitës në shkollën fillore “Lube Lape” në Komunën e Aerodromit, ku për të tretin vit radhazi komuna ndan tableta për nxënësit e kësaj komune. Lidhur me pagat e mësimdhënësve, Janevska përsëriti se në mars të vitit të ardhshëm do të ketë rritje të pagave, e cila, sipas saj, është siguruar në përputhje me marrëveshjen me SAShK-un.
