Shkup, 26 qershor – Zëvendëskryeministri i parë, Izet Mexhiti, ka reaguar përmes një postimi në rrjetet sociale lidhur me mungesën e një ligji për përfaqësim të drejtë në institucionet shtetërore. Ai ka drejtuar akuza të ashpra ndaj Bashkimit Demokratik për Integrim (BDI), duke i konsideruar përgjegjës për mungesën e zgjidhjeve ligjore në këtë drejtim, përcjell Zhurnal.mk.
Sipas Mexhitit, balancuesi nuk ka qenë ligj, por një mekanizëm informal që është përdorur për të maskuar mungesën e vërtetë të një kornize ligjore. “Balancuesi nuk ishte ligj por mungesë ligji. Prandaj u shfuqizua,” shkruan Mexhiti.
Ai akuzoi BDI-në se nuk ka pasur asnjëherë vullnet për të sjellë një ligj të mirëfilltë për përfaqësim të drejtë, duke ironizuar me angazhimet e saj në çështje të tjera. “Ata nuk mund të bënin ligj sepse luanin futboll nëpër zyrat e ministrive. Ishin të angazhuar për ta blerë Soravinën dhe për të ndërtuar perandorinë e bixhozit përmes Lotarisë,” shkruan Mexhiti.
Ai përfundon duke theksuar se “BDI asnjëherë nuk ka qenë e interesuar për përfaqësim të drejtë”, pasi, sipas tij, mungesa e rregullimit ligjor u ka shërbyer për të manipuluar procesin e punësimeve në këmbim të votave.
Kjo deklaratë e Mexhitit vjen në vazhdën e debatit për reformimin e sistemit të përfaqësimit në administratën shtetërore dhe pas miratimit të ligjit të ri për përfaqësim të drejtë.
