Shkup, 3 prill – Kryeministri Hristijan Mickoski sot realizoi takim me liderin e LSDM-së opozitare Venko Filipçe, ku u theksua nevoja për të punuar për një të ardhme të përbashkët për qytetarët, si dhe për të arritur një konsensus midis palëve të ndryshme për çështjet kyçe të shtetit dhe mirëqenien e të gjithë qytetarëve, kumtojnë nga Qeveria.
Siç citohet në kumtesë, Mickoski e ka theksuar nevojën të mobilizohen të gjithë individët dhe strukturat progresive që mund të kontribuojnë në rrugën e zhvillimit të vendit dhe kërkoi nga Filipçe të jetë faktor konstruktiv në përkushtimin për ndryshime, reforma dhe përparim.
“U theksua nevoja për të punuar për një të ardhme të përbashkët për qytetarët, si dhe për të arritur një konsensus midis palëve të ndryshme për çështjet kyçe të shtetit dhe mirëqenien e të gjithë qytetarëve. Në këtë kontekst, është e domosdoshme të mobilizohen të gjithë individët dhe strukturat progresive që mund të kontribuojnë në rrugën e zhvillimit të vendit. Interesat shtetërore maqedonase duhet të jenë pikënisje në bisedimet për çdo çështje”, qëndron në kumtesë.
Bashkëbiseduesit u dakorduan që të formohen grupe pune që do të diskutojnë mbi zgjidhjet ligjore reformuese që duhet të garantojnë angazhimet për përparim.
