Shkup, 12 qershor, Zhurnal.mk – Turqia është një nga partnerët ekonomikë dhe tregtarë më të rëndësishëm të Maqedonisë së Veriut, ndërsa shkëmbimi tregtar vitin e kaluar arriti në një miliard dollarë amerikanë – një rezultat i rëndësishëm dhe nxitje për objektiva edhe më ambicioze në të ardhmen, ka shkruar në Facebook ministri i Punëve të Jashtme dhe Tregtisë së Jashtme, Timço Mucunski, i cili sot mori pjesë në forumin e biznesit Maqedoni e Veriut – Turqi në Stamboll, transmeton Zhurnal.
Mucunski mbajti një fjalim në forum, i cili ishte i përkushtuar avancimit të lidhjeve ekonomike, shkëmbimit tregtar dhe bashkëpunimit investues mes dy vendeve. Ai theksoi se diplomacia ekonomike përbën një segment kyç të politikës së jashtme.
“Mesazhi që përcolla është i qartë: diplomacia ekonomike nuk është shtesë e politikës së jashtme, por bërthama e saj. Diplomacia e suksesshme sot nënkupton më shumë investime, më shumë eksport, tregje të reja dhe mundësi konkrete për kompanitë dhe qytetarët. Qeveritë krijojnë kornizën, institucionet hapin dyert, por kompanitë janë ato që krijojnë vlerë, vende pune dhe rezultate,” – shkroi Mucunski.
Ai shtoi se është e domosdoshme forcimi i mëtejshëm i bashkëpunimit të drejtpërdrejtë mes komuniteteve të biznesit dhe nxitja e partneriteteve të reja në sektorë të ndryshëm, si industria, TIK, logjistika, turizmi, agrobiznesi, infrastruktura dhe inovacionet.
Sipas tij, bashkëpunimi më i fortë ekonomik nuk është i rëndësishëm vetëm për dy vendet, por kontribuon edhe në rritjen e lidhjes rajonale, konkurrueshmërisë dhe zhvillimit. /Zhurnal.mk
