Shkup, 5 korrik Zhurnal.mk – Temperaturat e larta që po mbizotërojnë gjatë kësaj periudhe po ndikojnë ndjeshëm në shëndetin e qytetarëve, veçanërisht te personat me sëmundje kronike, të moshuarit, fëmijët dhe gratë shtatzëna. Kështu vlerëson mjeku i Ndihmës së Shpejtë, Sejfullah Ademi, i cili u bën thirrje qytetarëve të tregojnë kujdes të shtuar gjatë ditëve me vapë.
Sipas tij, ekspozimi i panevojshëm në diell duhet të shmanget, ndërsa pacientët kronikë duhet të respektojnë terapinë e rregullt dhe rekomandimet e mjekëve.
“Temperaturat e larta ndikojnë drejtpërdrejt në shëndetin e pacientëve. Apelojmë që të moshuarit dhe personat me sëmundje kronike të mos dalin pa nevojë gjatë orëve më të nxehta të ditës, të konsumojnë sa më shumë lëngje, të ushqehen lehtë dhe të veshin rroba të holla. Kjo do t’i ndihmojë ta përballojnë më lehtë këtë periudhë”, tha Ademi.
Edhe qytetarët pranojnë se puna dhe lëvizja në temperatura të larta është e vështirë. Shumë prej tyre thonë se përpiqen t’i kryejnë obligimet në orët e hershme të mëngjesit ose pasdite, kur temperaturat janë më të ulëta.
Mjeku Ademi bëri të ditur se ekipet e Ndihmës së Shpejtë po përballen me një numër më të madh thirrjesh në numrin emergjent 192, ku qytetarët kërkojnë ndihmë për probleme të shkaktuara nga vapa, si tension i lartë i gjakut, marramendje, plogështi, vështirësi në frymëmarrje dhe dhimbje koke.
Ai u bëri thirrje qytetarëve të tregojnë kujdes maksimal gjatë ditëve me temperatura të larta, duke respektuar terapinë mjekësore, duke shmangur ekspozimin në diell gjatë mesditës dhe duke ndjekur rekomandimet e autoriteteve shëndetësore për të parandaluar komplikimet.
