Tetovë, 5 korrik Zhurnal.mk – Temperaturat e larta që kanë përfshirë vendin gjatë ditëve të fundit kanë shtuar ndjeshëm interesimin e qytetarëve për të frekuentuar pishinat. Një ndër destinacionet më të vizituara është Pishina e Qytetit në Tetovë, e cila çdo ditë mirëpret vizitorë të të gjitha grupmoshave.
Qytetarët vlerësojnë kushtet që ofron pishina, duke theksuar se ajo shërben jo vetëm për rekreacion, por edhe për mësimin e notit dhe përfitimet shëndetësore. Sipas tyre, investime të ngjashme duhet të realizohen edhe në qytete të tjera dhe në zonat rurale.
“Është një pishinë shumë e mirë. Fëmijët relaksohen, mësojnë not dhe kalojnë kohë cilësore. Do të ishte mirë që pishina të tilla të ndërtohen edhe nëpër fshatra”, u shpreh një qytetar.
Të tjerë thanë se e vizitojnë pishinën pothuajse çdo ditë, ndërsa prindërit theksojnë se noti është i rëndësishëm për zhvillimin dhe shëndetin e fëmijëve.
Pishina funksionon nga e hëna deri të premten, nga ora 08:30 deri në 16:30, ndërsa gjatë fundjavës është e hapur nga ora 09:00 deri në 21:00.
Udhëheqësi i Sektorit për Sport në Komunën e Tetovës, Muhamed Avziu, tha se interesimi është veçanërisht i madh gjatë fundjavave dhe se objekti shfrytëzohet nga të gjitha grupmoshat.
Ai bëri të ditur se çdo të mërkurë dhe të shtunë, deri në orën 12:30, pishina është e rezervuar ekskluzivisht për gratë, me qëllim që t’u ofrohet më shumë privatësi.
Avziu theksoi gjithashtu se sistemi i filtrimit funksionon 24 orë në ditë, ndërsa cilësia e ujit kontrollohet vazhdimisht si nga stafi i pishinës, ashtu edhe nga Qendra për Shëndet Publik, e cila ka konfirmuar se uji plotëson standardet dhe është i pastër.
Ndërkohë, Komuna e Tetovës ka nisur ndërtimin e edhe dy pishinave të reja, një në shkollën fillore “Kirili dhe Metodi” dhe një tjetër në shkollën “Naim Frashëri”, investime që pritet të rrisin mundësitë për zhvillimin e sportit dhe rekreacionit në qytet.
