Shkup, 25 tetor – Sot, me fillim nga ora 15:05, në qytetin e Koçanit do të zhvillohet marshi protestues i 28-të “Për engjëjt”, në mbështetje të familjeve të viktimave të zjarrit në lokalin “Puls”, si dhe për drejtësi për 63 viktimat e tragjedisë së Koçanit.
Marshi do të nisë nga “Parku i Revolucionit”, do të kalojë përmes qendrës tregtare dhe do të vazhdojë deri te ndërtesat e Administratës së të Ardhurave Publike dhe të policisë së Koçanit.
Më pas, pjesëmarrësit do të marshojnë drejt rrethrrotullimit pranë urës së dyfishtë, ku do të bëhet një ndalesë e shkurtër dhe bllokadë nga të dy anët e rrugës.
Pas kësaj, turma do të vazhdojë drejt ndërtesës së Gjykatës Themelore dhe Prokurorisë Publike në Koçan, për t’u kthyer më pas përsëri te “Parku i Revolucionit”.
Ndërkohë, seanca e parë gjyqësore për tragjedinë e Koçanit është caktuar për datën 19 nëntor.
