Janë bërë një vit nga zgjedhja e kryetarëve shqiptarë në katër komunat veriore, Mitrovicë e Veriut, Zveçan, Leposaviq dhe Zubin Potok.
Zgjedhja e tyre në komunat përkatëse u shoqërua me tensione të shumta, ku grupe kriminale serbe protestuan dhunshëm duke mos kursyer asgjë, duke sulmuar gazetarët dhe ushtarët e KFOR-it, të cilët u përkujdesën për ruajtjen e rendit dhe qetësisë gjatë procesit të vendosjes së kryetarëve në detyrat tyre.
Por, një vit pas, nuk është ngritur asnjë aktakuzë ndaj atyre që ushtruan dhunë dhe nxitën tensione.
Telegrafi ka nisur disa pyetje drejtuar Prokurorisë Speciale të Kosovës, lidhur me procesin e hetimeve për rastet e ndodhura në veri dhe pse deri tani ende nuk është ngritur asnjë aktakuzë.
Prokuroria Speciale nuk është përgjigjur në pyetjet e dërguara nga Telegrafi dhe kjo nuk është hera e parë që kjo prokurori nuk deklarohet mbi këto raste.
Kritika në drejtim të Prokurorisë Speciale ka bërë para disa ditësh edhe kryeministri i vendit, Albin Kurti.
Kryeministri Kurti në deklarimet e tij ka thënë se nuk e kupton pse ende nuk është ngritur asnjë aktakuzë për sulmet e ndodhura, ku sipas tij, provat janë të qarta.
Në njëvjetorin e sulmit ndaj KFOR-it në Zveçan, komandanti i KFOR-it, Ozkan Ulutash ka theksuar se guximi i ushtarëve ndihmoi në stabilizimin e situatës në atë zonë dhe parandalimin e një përshkallëzimi të mëtejshëm të dhunës.
Lidhur me situatën në veri, analistët në Kosovë kanë vlerësuar se sulmet janë organizuar nga presidenti i Serbisë, Aleksandar Vuçiq. Sipas tyre, situata në atë pjesë duhet të vëzhgohet pasi që Serbia ka qëllim rikthimin e tensioneve.
Gjithashtu, vlen të theksohet se për sulmin e ndodhur në shtator, ku u vra polici Afrim Bunjaku, përgjegjësinë për sulm e ka marrë ish-nënkryetari Milan Radoiçiq, dhe se ndaj tij nuk është ndërmarrë asnjë vendim.
Pas sulmit, policia ka konfiskuar sasi të madhe të armatimit në atë zonë.
Sulmet e ndodhur në veri u dënuan fuqishëm edhe nga ndërkombëtarët.
